سورة عبس - آیت 3

وَمَا يُدْرِيكَ لَعَلَّهُ يَزَّكَّىٰ

اور آپ کو کیا معلوم کہ شاید اس کی اصلاح ہوجاتی

وَ مَا يُدْرِيْكَ لَعَلَّهٗ يَزَّكّٰى ....: آپ نے جو یہ سمجھا کہ یہ نابینا تو مسلمان ہی ہے، کسی اور وقت مسئلہ پوچھ لے گا، مجھے کافر کو مسلمان بنانے پر زیادہ توجہ دینی چاہیے تو یہ بات اگرچہ ایک حد تک درست ہے، مگر آپ کو اس بات کا خیال بھی ضروری تھا کہ وہ کافر تو آپ کی ہدایت سے فائدہ اٹھانے پر تیار ہی نہیں۔ خوف ناک بیماری میں مبتلا شخص کا علاج مقدم ہونا چاہیے مگر وہ دوا لینے پر آمادہ ہی نہ ہو تو اس کی امید میں آپ اپنے ساتھیوں سے کیوں بے توجہی کریں، جو دوائے دل کے طالب ہیں کہ آپ توجہ فرمائیں تو وہ جہل اور گناہ سے خوب پاک صاف ہو جائیں۔ ’’ يَزَّكّٰى ‘‘ میں مبالغہ ہے، یاآپ کی نصیحت سے انھیں نفع حاصل ہو جائے ۔