سورة المدثر

وَلَا تَمْنُن تَسْتَكْثِرُ

اور احسان اس لئے نہ کیجیے کہ اس سے زیادہ حاصل کیجیے

وَ لَا تَمْنُنْ تَسْتَكْثِرُ: ’’مَنَّ يَمُنُّ‘‘ احسان کرنا۔ ’’اِسْتَكْثَرَ‘‘ (استفعال) زیادہ طلب کرنا۔ ’’اِسْتَكْثَرَ الشَّيْءَ‘‘ کا معنی کسی چیز کو زیادہ سمجھنا بھی آتا ہے۔ یعنی آپ کسی پر احسان کریں تو اس نیت سے نہیں کہ مجھے اس سے زیادہ ملے گا۔ نہ راہ حق کی طرف رہنمائی کے احسان پر کسی سے کوئی توقع رکھیں، نہ کسی کو کچھ دے کر اس سے زیادہ حاصل ہونے کی طلب رکھیں، توقع اور طلب صرف اپنے پروردگار سے رکھیں۔ اس کے علاوہ یہ معنی بھی درست ہے کہ آپ کسی پر جتنا بھی احسان کریں اسے زیادہ نہ سمجھیں ۔ اس آیت میں داعی کو ہر قسم کے طمع اور لالچ سے اجتناب کا حکم ہے، کیونکہ یہ چیز دعوت الی اللہ کے لیے سخت نقصان دہ ہے۔