سورة الجاثية

وَإِذَا عَلِمَ مِنْ آيَاتِنَا شَيْئًا اتَّخَذَهَا هُزُوًا ۚ أُولَٰئِكَ لَهُمْ عَذَابٌ مُّهِينٌ

اور جب اسے ہماری کسی آیت کی خبر (٥) ہوتی ہے، تو اس کا مذاق اڑاتا ہے، ان لوگوں کے لئے رسواکن عذاب ہے

1۔ وَ اِذَا عَلِمَ مِنْ اٰيٰتِنَا شَيْـًٔا اتَّخَذَهَا هُزُوًا: ’’ اتَّخَذَهَا ‘‘ میں ضمیر ’’ هَا ‘‘ ’’ شَيْـًٔا ‘‘ کی طرف بھی لوٹ سکتی ہے، کیونکہ ’’ اٰيٰتِنَا ‘‘ کا لفظ اگرچہ مذکر ہے مگر اس سے مراد کوئی ’’آيَةٌ‘‘ (آیت) ہے، اس لیے ضمیر مؤنث ’’ هَا ‘‘ استعمال فرمائی ہے اور ’’ اٰيٰتِنَا ‘‘ کی طرف بھی لوٹ سکتی ہے۔ پہلی صورت میں مطلب یہ ہو گا کہ جب وہ ہماری آیات میں سے کوئی آیت معلوم کر لیتا ہے (جسے وہ صحیح طور پر سمجھ نہیں پاتا یا جس کا مطلب الٹا نکال لیتا ہے) تو اسے مذاق بنا لیتا ہے۔ دوسری صورت میں مطلب یہ ہے کہ جب وہ ہماری آیات میں سے کوئی آیت معلوم کر لیتا ہے تو صرف اس کا مذاق اڑانے پر اکتفا نہیں کرتا بلکہ ہماری تمام آیات کو مذاق بنا لیتا ہے۔ مثلاً جب اس کے ہاتھ قرآن مجید کی کوئی ایسی بات آتی ہے جس کا مطلب توڑ مروڑ کر اس کا مذاق اڑا سکتا ہے تو تمام آیات کا مذاق اڑاتے ہوئے کہتا ہے کہ قرآن کی سبھی آیات ایسی ہیں۔ یہ اس کے بدترین ’’افاك‘‘ و ’’اثيم‘‘ ہونے کا بیان ہے کہ آیاتِ الٰہی سن کر وہ کفر پر اصرار ہی نہیں کرتا بلکہ ناحق ان کا مذاق بھی اڑاتا ہے اور اتنا کہ انھیں مذاق بنا لیتا ہے۔ 2۔ اُولٰٓىِٕكَ لَهُمْ عَذَابٌ مُّهِيْنٌ: آیاتِ الٰہی کی اہانت کے بدلے میں ان کے لیے ذلیل کرنے والا عذاب ہے۔ اس آیت میں آیات سے استہزا اور ان کی توہین کی مناسبت سے ان کے لیے عذابِ مہین کی خبر دی۔