سورة الشعراء - آیت 117

قَالَ رَبِّ إِنَّ قَوْمِي كَذَّبُونِ

ترجمہ تیسیر الرحمن لبیان القرآن - محمد لقمان سلفی صاحب

نوح نے دعا (٣٣) کی، میرے رب ! میری قوم نے مجھے یکسر جھٹلا دیا ہے۔

تفسیر القرآن کریم (تفسیر عبدالسلام بھٹوی) - حافظ عبدالسلام بن محمد

قَالَ رَبِّ اِنَّ قَوْمِيْ كَذَّبُوْنِ : ’’كَذَّبُوْنِ‘‘اصل میں ’’كَذَّبُوْنِيْ‘‘ ہے۔ جب قوم اس حد تک پہنچ گئی کہ اپنے رسول کو سنگسار کر دے اور اللہ تعالیٰ نے نوح علیہ السلام کو اطلاع بھی دے دی کہ اب ان میں سے مزید کوئی ایمان نہیں لائے گا (دیکھیے ہود : ۳۷) تو انھوں نے اللہ تعالیٰ سے دعا کی، اس دعا کے الفاظ قرآن میں مختلف مقامات پر موجود ہیں، فرمایا : ﴿ اَنِّيْ مَغْلُوْبٌ فَانْتَصِرْ ﴾[القمر:۱۰] ’’کہ بے شک میں مغلوب ہوں، سو تو بدلا لے۔‘‘ اور فرمایا : ﴿ رَبِّ لَا تَذَرْ عَلَى الْاَرْضِ مِنَ الْكٰفِرِيْنَ دَيَّارًا ﴾ [نوح : ۲۶ ] ’’اے میرے رب! زمین پر ان کافروں میں سے کوئی رہنے والا نہ چھوڑ۔‘‘ یہاں انھوں نے جو کہا ہے کہ ’’اے میرے رب! میری قوم نے مجھے جھٹلا دیا‘‘ یہ اللہ کے حضور شکایت کے لیے ہے، یہ نہیں کہ اللہ تعالیٰ کو یہ بات معلوم نہیں اور نوح علیہ السلام اسے بتا رہے ہیں۔