سورة طه - آیت 62

فَتَنَازَعُوا أَمْرَهُم بَيْنَهُمْ وَأَسَرُّوا النَّجْوَىٰ

تو وہ اپنے معاملے میں آپس میں اختلاف کرنے لگے، اور سرگوشی کرنے لگے۔

فَتَنَازَعُوْا اَمْرَهُمْ بَيْنَهُمْ....: نصیحت بعض پر مؤثر ہوئی، بعض پر نہیں۔ چنانچہ وہ آپس میں چپکے چپکے جھگڑنے لگے، تاکہ فرعون یا موسیٰ یا عوام میں سے کسی کو ان کے باہمی اختلاف کی خبر نہ ہونے پائے۔ ’’النَّجْوٰى‘‘آپس کی خفیہ بات، سرگوشی۔ ’’ اَسَرُّوا ‘‘ انھوں نے پوشیدہ کیا۔ ’’النَّجْوٰى‘‘(سرگوشی) خود پوشیدہ ہوتی ہے، پھر ’’اَسَرُّوا ‘‘سے اس کی مزید پوشیدگی کا اندازہ کریں اور اس سے پہلے ’’بَيْنَهُمْ‘‘(آپس میں) کا لفظ بتاتا ہے کہ اس جھگڑے کی خبر اس محدود گروہ کے درمیان ہی رہی، باہر نہیں نکلی۔ (ابن عاشور) کوئی کہنے لگا، موسیٰ جادوگر ہے اور کوئی کہنے لگا، یہ چہرہ جادوگر کا نہیں ہو سکتا۔