سورة نوح - آیت 25

مِّمَّا خَطِيئَاتِهِمْ أُغْرِقُوا فَأُدْخِلُوا نَارًا فَلَمْ يَجِدُوا لَهُم مِّن دُونِ اللَّهِ أَنصَارًا

ترجمہ تیسیر الرحمن لبیان القرآن - محمد لقمان سلفی صاحب

چنانچہ وہ تمام کے تمام اپنے گناہوں کے سبب ڈبو (13) دئیے گئے، پھر آگ میں داخل کر دئیے گئے، پس انہوں نے اللہ کے سوا مدد گاروں کو نہیں پایا

تفسیر تیسیر القرآن - مولانا عبدالرحمٰن کیلانی

[١٥] عذاب قبر کا ثبوت :۔ طوفان نوح کا ذکر سورۃ اعراف کے حاشیہ ٦٨ اور سورۃ یونس کے حاشیہ ٨٣ کے تحت تفصیل سے گزر چکا ہے۔ جب یہ طوفان آیا تو اس قوم کے معبود ان کے کسی کام نہ آسکے بلکہ وہ بھی ان کے ساتھ غرق ہوگئے اور غرق ہونے کے ساتھ ہی انہیں جہنم میں داخل کردیا گیا۔ یہ آیت بھی منجملہ ان آیات کے ہے جن سے برزخ یا عذاب قبر کا ثبوت قرآن سے مہیا ہوتا ہے۔