وَمِنَ الْأَنْعَامِ حَمُولَةً وَفَرْشًا ۚ كُلُوا مِمَّا رَزَقَكُمُ اللَّهُ وَلَا تَتَّبِعُوا خُطُوَاتِ الشَّيْطَانِ ۚ إِنَّهُ لَكُمْ عَدُوٌّ مُّبِينٌ
اور چوپایوں میں سے بعض بوجھ اٹھانے والے (142) پیدا کیے ہیں، اور بعض زمین سے لگے ہوئے (یعنی چھوٹے قد کے) اللہ نے تمہیں جو روزی دی ہے اس میں سے کھاؤ، اور شیطان کے نقش قدم پر نہ چلو بے شک وہ تمہاری کھلا دشمن ہے
بوجھ اٹھانے والے جانور: جیسے اونٹ، بیل، گھوڑا، گدھا وغیرہ۔ چھوٹے قد والے: سے مراد بھیڑ بکری وغیرہ جس کا تم دودھ پیتے اور گوشت کھاتے ہو۔ ان کے بالوں سے اون اور قالین تیار کرتے ہو۔ ارشاد باری تعالیٰ ہے: ﴿اَوَ لَمْ يَرَوْا اَنَّا خَلَقْنَا لَهُمْ مِّمَّا عَمِلَتْ اَيْدِيْنَا اَنْعَامًا فَهُمْ لَهَا مٰلِكُوْنَ۔ وَ ذَلَّلْنٰهَا لَهُمْ فَمِنْهَا رَكُوْبُهُمْ وَ مِنْهَا يَاْكُلُوْنَ﴾ (یٰٓس: ۷۱۔ ۷۲) ’’کیا انھوں نے اس بات پر نظر نہیں کی کہ ہم نے ان کے لیے چوپائے پیدا کردیے ہیں جو ہمارے ہی ہاتھوں کے بنائے ہوئے ہیں اور اب ان کے مالک بن بیٹھے ہیں۔ ان مویشیوں کو ہم نے ان کے تابع فرمان بنا دیا جن میں سے بعض تو ان کی سواریاں ہیں اور بعض کا گوشت کھاتے ہیں۔‘‘ شیطان کی پیروی سے مراد: جس طرح مشرکین نے اللہ کی پیدا کی ہوئی چیزوں میں ازخود حلال و حرام کی تقسیم کردی ۔ تم بھی یہ کرکے شیطان کے ساتھی نہ بنو وہ تمہارا کھلا دشمن ہے اُس نے تمہارے باپ حضرت آدم علیہ السلام کو جنت سے نکلوایا۔