سورة العاديات

وَالْعَادِيَاتِ ضَبْحًا

گھوڑوں کی قسم (١) جو (دشمن کی طرف تیزی کے ساتھ) پھنکارتے ہوئے دوڑتے ہیں

اللہ تعالیٰ قسم كھاتا ہے مجاہدین كے گھوڑوں كی جب كہ وہ خدا كی راہ میں جہاد كے لیے ہانپتے اور ہنہناتے ہوئے دوڑتے ہیں۔ پھر تیزی سے دوڑتے ہوئے پتھروں كے ساتھ ان كی نعل كا ٹكرانا اور اس رگڑ سے آگ كی چنگاریاں اڑانا پھر صبح كے وقت دشمن پر ان كا چھاپہ مارنا اور دشمنان خدا كو تہہ وبالا كرنا، یعنی یہ كفار كے لشكر پر جا پڑتے ہیں۔ چنانچہ رسول اللہ صلی اللہ علیہ وسلم كی عادت مباركہ تھی كہ آپ صلی اللہ علیہ وسلم كسی منزل پر پہنچ جاتے تو صبح كا انتظار كرتے رہتے، اگر بستی سے اذان كی آواز آجاتی تو پھر حملہ نہیں كرتے تھے اور اگر نہ آتی تو حملہ كر دیتے۔(مسلم: ۳۸۲)