سورة النسآء - آیت 80

مَّن يُطِعِ الرَّسُولَ فَقَدْ أَطَاعَ اللَّهَ ۖ وَمَن تَوَلَّىٰ فَمَا أَرْسَلْنَاكَ عَلَيْهِمْ حَفِيظًا

ترجمہ تیسیر الرحمن لبیان القرآن - محمد لقمان سلفی صاحب

جس نے رسول کی اطاعت (87) کی اس نے اللہ کی اطاعت کی، اور جس نے روگردانی کی تو ہم نے آپ کو ان کا پہرہ دار بنا کر نہیں بھیجا ہے

تسہیل البیان فی تفسیر القرآن - ام عمران شکیلہ بنت میاں فضل حسین

اللہ کا مطیع وہی ہے جو رسول اللہ کا مطیع ہو۔ کوئی لاکھ دعویٰ کرے کہ وہ اللہ اور قرآن کی اطاعت کرتا ہے وہ جھوٹا ہے جب تک کہ اللہ کے رسول کی سنت کا پابند نہ ہو۔ اللہ تعالیٰ فرماتے ہیں ہر کوئی اپنے اعمال کا خود ذمہ دار ہے۔ ان کے اعمال کی آپ سے باز پُرس نہیں ہوگی، آپ کے سپرد تو صرف یہ کام ہے کہ آپ اللہ کے احکام و ہدایت کو لوگوں تک پہنچادیں۔ اب یہ آپ کا کام نہیں کہ ہاتھ پکڑ کر زبردستی راہ راست پر چلائیں۔