سورة القلم

فَذَرْنِي وَمَن يُكَذِّبُ بِهَٰذَا الْحَدِيثِ ۖ سَنَسْتَدْرِجُهُم مِّنْ حَيْثُ لَا يَعْلَمُونَ

اے میرے نبی ! مجھے اور اس کلام کی تکذیب (13) کرنے والے کو چھوڑ دیجیے، ہم انہیں کشاں کشاں (جہنم کی طرف) اس طور پر لے جائیں گے کہ وہ جان بھی نہیں سکیں گے

استدراج كے لغوی معنی میں دو باتیں بنیادی طور پر پائی جاتی ہیں ایك تدریج دوسری آہستگی۔ یعنی یہ قریشی سردار جو اللہ كی آیات كو جھٹلاتے ہیں پھر وہ یہ بھی سمجھے بیٹھے ہیں كہ چونكہ وہ خوشحال اور آسودہ ہیں لہٰذا ان كا پروردگار ان پر مہربان ہے، حالانكہ اللہ انہیں آہستہ آہستہ ہلاكت اور تباہی كی طرف لے جا رہا ہے۔ اللہ فرماتا ہے كہ میری ڈھیل كے راز كو یہ نہ سمجھیں گے میں انھیں بڑھاتا چلا جاؤں گا۔ یہ بدمست ہوتے چلے جائیں اور میں اچانك انھیں پكڑ لوں گا، میں آپ ہی ان سے نمٹ لوں گا۔