سورة الطور

أَمْ يُرِيدُونَ كَيْدًا ۖ فَالَّذِينَ كَفَرُوا هُمُ الْمَكِيدُونَ

کیا وہ کوئی چال چلنا (٢٣) چاہتے ہیں، تو (جان لیں کہ) جو لوگ کفر کرتے ہیں درحقیقت وہی فریب خوردہ ہیں

یعنی اگر یہ سب باتیں نہیں تو لا محالہ یہ ان کی فریب کا رانہ چالیں ہیں کہ آپ پر طرح طرح کے الزامات لگا کر لوگوں کو آپ صلی اللہ علیہ وسلم سے بدظن کر دیں اور آپ کی ہمت توڑ دیں لیکن یہ یاد رکھنا چاہیے کہ عنقریب یہ اپنی چالبازیوں، شاطرانہ چالوں اور سازشوں کے جال میں خود پھنس جائیں گے۔ یعنی یہ کید و مکر ان پر ہی الٹ پڑے گا اور سارا نقصان انہی کا ہو گا جیسے سورہ فاطر (۴۳) میں ارشاد ہے: ﴿مَكْرَ السَّيِّئِ وَ لَا يَحِيْقُ الْمَكْرُ السَّيِّئُ اِلَّا بِاَهْلِهٖ﴾ ’’اور بری تدبیروں کا وبال ان تدبیروں والوں پر ہی پڑتا ہے۔‘‘