سورة غافر - آیت 30

وَقَالَ الَّذِي آمَنَ يَا قَوْمِ إِنِّي أَخَافُ عَلَيْكُم مِّثْلَ يَوْمِ الْأَحْزَابِ

اور مرد مومن نے کہا اے میری قوم کے لوگو ! میں تمہارے بارے میں گذشتہ کافر گروہوں کے برے دن (١٨) جیسے دن سے ڈرتا ہوں

اس مومن آدمی نے دوبارہ اپنی قوم کو ڈرایا کہ دیکھو اگر تم نے اللہ کے رسول کی نہ مانی اور اپنی سرکشی پر اڑے رہے تو مجھے ڈر ہے کہ کہیں سابقہ قوموں کی طرح تم پر بھی عذاب الٰہی برس نہ پڑے۔ قوم نوح، قوم عاد اور قوم ثمود کو دیکھ لو۔ اللہ نے جن کو بھی ہلاک کیا ان کے گناہوں کی پاداش میں اور رسولوں کی تکذیب اور مخالفت کی وجہ سے ہی ہلاک کیا۔ ورنہ وہ شفیق و رحیم رب اپنے بندوں پر ظلم کرنے کا ارادہ نہیں کرتا۔ گویا قوموں کی ہلاکت، یہ ان پر اللہ کا ظلم نہیں، بلکہ قانون مکافات کا ایک لازمی نتیجہ ہے۔ جس سے کوئی قوم اور کوئی فرد مستثنیٰ نہیں۔