سورة غافر - آیت 11

قَالُوا رَبَّنَا أَمَتَّنَا اثْنَتَيْنِ وَأَحْيَيْتَنَا اثْنَتَيْنِ فَاعْتَرَفْنَا بِذُنُوبِنَا فَهَلْ إِلَىٰ خُرُوجٍ مِّن سَبِيلٍ

ترجمہ تیسیر الرحمن لبیان القرآن - محمد لقمان سلفی صاحب

اہل کفر کہیں گے، اے ہمارے رب ! تو نے ہمیں دو بار موت (٧) دی، اور دو بار زندگی دی، اب ہم اپنے گناہوں کا اعتراف کرتے ہیں، تو کیا یہاں سے نکل کر دو بار دنیا میں جانے کا کوئی راستہ ہے

تسہیل البیان فی تفسیر القرآن - ام عمران شکیلہ بنت میاں فضل حسین

زندگی اور موت کے چار مراحل: جمہور مفسرین کی تفسیر کے مطابق دو موتوں میں سے پہلی موت تو وہ نطفہ ہے جو باپ کی پشت میں ہوتا ہے۔ یعنی اس کے وجود (ہیت) سے پہلے اس کے عدم وجود (نیست) کو موت سے تعبیر کیا گیا ہے۔ اور دوسری موت وہ ہے جس سے انسان اپنی زندگی گزار کر ہم کنار ہوتا ہے۔ اور اس کے بعد قبر میں دفن ہوتا ہے۔ اور دو زندگیوں میں سے پہلے زندگی، یہ دنیوی زندگی ہے، جس کا آغاز ولادت سے اور اختتام موت پر ہوتا ہے۔ اور دوسری زندگی وہ ہے جو قیامت والے دن قبروں سے اٹھنے کے بعد حاصل ہوگی۔ یومِ آخرت کو دیکھ کر کافر کہیں گے کہ ہم آج اس بات کا اعتراف کرتے ہیں کہ رسولوں کا کہنا برحق تھا اور آج ہمیں جو اپنا انجام نظر آ رہا ہے اس سے بچنے کی بھی کوئی راہ ہے۔