سورة الأنبياء

فَإِن تَوَلَّوْا فَقُلْ آذَنتُكُمْ عَلَىٰ سَوَاءٍ ۖ وَإِنْ أَدْرِي أَقَرِيبٌ أَم بَعِيدٌ مَّا تُوعَدُونَ

پس اگر وہ لوگ منہ پھیر لیں تو آپ کہہ دیجیے کہ میں نے تمہیں پورے طور پر خبر کردی ہے اور میں نہیں جانتا کہ تم سے جس عذاب کا وعدہ کیا جارہا ہے اس کا وقت قریب ہے یا دور۔

اللہ تعالیٰ اپنے نبی برحق کو حکم دیتا ہے کہ آپ مشرکوں سے کہہ دیں کہ میری جانب یہی وحی کی جاتی ہے کہ صرف اللہ تعالیٰ ہی معبود برحق ہے۔ تم سب بھی اسے تسلیم کر لو۔ اور چاہے تو انکار کر دو انکار کی صورت میں تم پر عذاب ضرور آئے گا لیکن میں یہ نہیں کہہ سکتا کہ وہ عذاب کب آئے گا؟ جلد آئے گا یا دیر سے آئے گا کیونکہ میں عالم الغیب نہیں ہوں ظاہر اور باطن کا عالم اللہ ہی ہے۔ جو تم چھپا کر کرو یا ظاہر کرو اسے سب علم ہے۔ چھوٹا، بڑا کھلا چھپا ہر قسم کا عمل سب کچھ وہ جانتا ہے۔