وَاقْتَرَبَ الْوَعْدُ الْحَقُّ فَإِذَا هِيَ شَاخِصَةٌ أَبْصَارُ الَّذِينَ كَفَرُوا يَا وَيْلَنَا قَدْ كُنَّا فِي غَفْلَةٍ مِّنْ هَٰذَا بَلْ كُنَّا ظَالِمِينَ
اور اللہ کے وعدہ برحق (قیامت) کا وقت قریب آجائے گا اور اس وقت اہل کفر کی نگاہیں پتھرائی ہوئی ہوں گی (اور کہیں گے) اے ہماری بد نصیبی ! ہم تو اس دن سے بالکل ہی غافل تھے بلکہ ہم تو (اپنے حق میں) ظالم تھے۔
قیامت بدترین لوگوں پر قائم ہوگی: یعنی یاجوج ماجوج کی یورش کے بعد جلد ہی قیامت بپا ہو جائے گی قیامت کے بپا ہونے سے پہلے سب نیک لوگوں کو اٹھا لیا جائے گا۔ چنانچہ عبداللہ بن عمرو بن عاص رضی اللہ عنہما فرماتے ہیں کہ قیامت ان لوگوں پر قائم ہوگی جو اللہ کی مخلوق سے بدترین لوگ ہوں گے۔ (مسلم: ۱۹۲۴) یہ بدترین لوگ جب قیامت واقع ہونے کا منظر دیکھیں گے تو ان کی آنکھیں پھٹی کی پھٹی رہ جائیں گی اس وقت وہ حسرت و یاس سے کہیں گے کہ ہم تو بھولے ہی رہے پھر خود ہی کہنے لگیں گے کہ یہ صرف بھول ہی نہیں بلکہ یہ ہماری خطا تھی کہ ہم نے پیغمبروں کی بات نہ مانی ورنہ انھوں نے توسمجھانے میں کچھ کسر نہ چھوڑی تھی۔