سورة الأنبياء

قَالُوا مَن فَعَلَ هَٰذَا بِآلِهَتِنَا إِنَّهُ لَمِنَ الظَّالِمِينَ

انہوں نے کہا، جس نے ہمارے بتوں کا یہ حال بنایا ہے وہ یقینا ظالم آدمی ہے۔

جب ان لوگوں نے میلہ سے واپس آکر اپنے مشکل کشاؤں کی یہ حالت دیکھی تو انھیں بہت دکھ ہوا۔ انھیں یہ خیال تک نہ آیا کہ بڑے بت کے کندھے پر جو کلہاڑا رکھا ہے شاید اسی بڑے خدا نے چھوٹے خداؤں کو تہس نہس کر دیا ہو۔ کیونکہ وہ جانتے تھے کہ بت تو اپنی جگہ سے ہل بھی نہیں سکتے توڑ پھوڑ کا کام کیسے کرسکتے ہیں۔ اور یہی بات سیدنا ابراہیم علیہ السلام انھیں سمجھانا چاہتے تھے۔ انھیں خیال آیا تو صرف یہ کہ جس کسی نے یہ کام کیا ہے وہ بڑا ظالم ہے۔ اس وقت جن لوگوں نے سیدنا ابراہیم علیہ السلام کا یہ کلام سنا تھا انھیں خیال آگیا اور کہنے لگے، وہ نوجوان جس کا نام ابراہیم ہے اُسے ہم نے اپنے معبودوں کی مذمت کرتے ہوئے سنا تھا۔