سورة الإسراء

قُلِ ادْعُوا اللَّهَ أَوِ ادْعُوا الرَّحْمَٰنَ ۖ أَيًّا مَّا تَدْعُوا فَلَهُ الْأَسْمَاءُ الْحُسْنَىٰ ۚ وَلَا تَجْهَرْ بِصَلَاتِكَ وَلَا تُخَافِتْ بِهَا وَابْتَغِ بَيْنَ ذَٰلِكَ سَبِيلًا

آپ کہہ دیجیے کہ تم لوگ اللہ کے نام سے پکارو یا رحمن (٧٠) کے نام سے پکارو، جس نام سے چاہو اسے پکارو، تمام بہترین نام اسی کے لیے ہیں اور آپ اپنی نماز نہ زیادی اونچی آواز سے پڑھیے اور نہ ہی بالکل پست آواز سے، بلکہ ان دونوں کے درمیان کا طریقہ اختیار کیجیے۔

رحمن و رحیم: کفار اللہ کی صفت رحمت کے منکر تھے اور بعض آثار میں آتا ہے کہ بعض مشرکین نے نبی صلی اللہ علیہ وسلم کی زبان سے رحمن ورحیم کے الفاظ سنے تو کہا کہ ہمیں تو کہتا ہے کہ صرف اللہ کو پکارو اور خود دو معبودوں کو پکار رہا ہے جس پر یہ آیت نازل ہوئی۔ (طبری: ۱۷/ ۵۸۰، بحوالہ ابن کثیر) اس اعتراض کا یہ جواب دیا گیا ہے کہ اللہ اور رحمن دو الٰہ نہیں بلکہ ایک ہی ذات کے دو نام ہیں تم جونسا چاہو پکار سکتے ہو، بلکہ اللہ کے تو اور بھی بہت سے اچھے اچھے صفاتی نام ہیں۔ صحیح حدیث کی رو سے یہ ننانوے نام ہیں اس کے علاوہ اور بھی کئی نام جو کتاب و سنت میں مذکور ہیں۔ قرآن کی تلاوت آہستہ اور جہری آواز میں پڑھنے سے متعلق ابن عباس رضی اللہ عنہما فرماتے ہیں کہ مکہ میں نبی صلی اللہ علیہ وسلم چھپ کر رہتے تھے، جب اپنے ساتھیوں کو نماز پڑھاتے تو آواز قدرے بلند فرما لیتے، مشرکین قرآن سن کر قرآن کو اور اللہ کو سب و شتم کرتے، اللہ تعالیٰ نے فرمایا، اپنی آواز کو اتنا اونچا نہ کرو کہ مشرکین قرآن کو سن کر برا بھلا کہیں او رنہ آواز اتنی پست کرو کہ صحابہ کرام رضی اللہ عنہم بھی نہ سن سکیں۔ (بخاری: ۴۷۲۲) مشکوٰۃ باب صلوٰۃ اللیل میں آپ صلی اللہ علیہ وسلم کا واقعہ ہے کہ ایک رات نبی صلی اللہ علیہ وسلم کا گزر حضرت ابوبکر صدیق رضی اللہ عنہ کے پاس سے ہوا تو دیکھا کہ وہ پست آواز سے نماز پڑھ رہے ہیں، پھر حضرت عمر رضی اللہ عنہ کو بھی دیکھنے کا اتفاق ہوا تو وہ اونچی آواز سے نماز پڑھ رہے تھے۔ آپ صلی اللہ علیہ وسلم نے دونوں سے اس بارے پوچھا تو حضرت ابوبکر رضی اللہ عنہ نے فرمایا میں جس کے ساتھ مصروفِ مناجات تھا وہ میری آواز سن رہا تھا، حضرت عمر رضی اللہ عنہ نے جواب دیا کہ میرا مقصد سوتوں کو جگانا اور شیطان کو بھگانا تھا۔ آپ صلی اللہ علیہ وسلم نے صدیق اکبر رضی اللہ عنہ سے فرمایا، اپنی آواز قدرے بلند کرو اور عمر رضی اللہ عنہ سے کہا کہ اپنی آواز کچھ پست رکھو۔ (ابو داؤد: ۱۳۲۹) حضرت عائشہ رضی اللہ عنہا فرماتی ہیں کہ یہ آیت دعا کے بارے میں نازل ہوئی۔ (بخاری: ۴۷۲۳)