سورة یوسف - آیت 26

قَالَ هِيَ رَاوَدَتْنِي عَن نَّفْسِي ۚ وَشَهِدَ شَاهِدٌ مِّنْ أَهْلِهَا إِن كَانَ قَمِيصُهُ قُدَّ مِن قُبُلٍ فَصَدَقَتْ وَهُوَ مِنَ الْكَاذِبِينَ

ترجمہ تیسیر الرحمن لبیان القرآن - محمد لقمان سلفی صاحب

یوسف نے کہا اسی نے مجھے گناہ (٢٦) پر مجبور کرنا چاہا تھا، اور عورت کے خاندان والوں میں سے ایک گواہ نے گواہی دی کہ اگر اس کی قمیص آگے سے پھٹی ہے تو یہ سچی ہے اور یوسف جھوٹا ہے۔

تسہیل البیان فی تفسیر القرآن - ام عمران شکیلہ بنت میاں فضل حسین

جب حضرت یوسف علیہ السلام نے دیکھا کہ وہ عورت تمام الزام ان پر دھر رہی ہے اور خیانت کی بدترین تہمت لگتی دیکھی تو اپنے اوپر سے الزام ہٹانے اور صاف اور سچی حقیقت کے ظاہر کر دینے کے لیے فرمایا کہ یہی میرے پیچھے پڑی تھیں۔ میرے بھاگنے پر مجھے پکڑ رہی تھیں یہاں تک کہ میراکرتا بھی پھاڑ دیا انھی کے خاندان کا کوئی سمجھ دار آدمی تھا جس نے یہ فیصلہ کیا (فیصلہ کو یہاں شہادت کے لفظ سے تعبیر کیا گیا) اور ثبوت اور دلیل کے ساتھ ان سے کہا کہ پھٹے ہوئے کرتے کو دیکھ لو اگر وہ سامنے کے رخ سے پھٹا ہوا ہے تو ظاہر ہے کہ عورت سچی ہے اور یوسف جھوٹا ہے اور اگر اس کا کرتا پیچھے سے پھٹا ہے تو عورت کے جھوٹا اور مرد کے سچا ہونے میں شبہ نہیں۔