وَإِلَىٰ ثَمُودَ أَخَاهُمْ صَالِحًا ۚ قَالَ يَا قَوْمِ اعْبُدُوا اللَّهَ مَا لَكُم مِّنْ إِلَٰهٍ غَيْرُهُ ۖ هُوَ أَنشَأَكُم مِّنَ الْأَرْضِ وَاسْتَعْمَرَكُمْ فِيهَا فَاسْتَغْفِرُوهُ ثُمَّ تُوبُوا إِلَيْهِ ۚ إِنَّ رَبِّي قَرِيبٌ مُّجِيبٌ
اور ہم نے صالح (٤٨) کو ان کے بھائی ثمود کے پاس رسول بنا کر بھیجا، انہوں نے کہا اے میری قوم کے لوگو ! تم اللہ کی عبادت کرو، اس کے علاوہ تمہارا کوئی معبود نہیں ہے، اس نے تمہیں مٹی سے پیدا کیا اور اس میں تمہیں آباد کیا، تو تم اس سے مغفرت طلب کرو، پھر اس کی جناب میں توبہ کرو، بیشک میرا رب قریب ہے اور دعا قبول کرتا ہے۔
حضرت صالح علیہ السلام نے بھی سب سے پہلے اپنی قوم کو توحید کی دعوت دی جس طرح کہ تمام انبیاء کا طریقہ رہا ہے۔ یعنی پہلے آدم علیہ السلام کو مٹی سے پیدا کیا پھر تمھاری تمام ضروریات زندگی اسی زمین سے پیدا کیں اور اسی پر تمھاری آباد کاری کابندوبست کیا۔ یعنی یہ سارے کام تو اللہ نے کیے ہیں بتاؤ تمھارے معبودوں نے ان میں سے کون سا کام کیا ہے۔ جو تم ان کی پرستش کرتے ہو اگر تم اللہ کے خالق و رازق ہونے کو تسلیم کرتے ہو تو پھر تمھیں اللہ ہی کی طرف رجوع کرنا چاہیے اسی کی اطاعت کرو۔ اسی سے اپنے گناہوں کی معافی مانگو۔ وہ بہت ہی قریب ہے اور دعائیں قبول کرنے والا ہے۔