وَمَا كَانَ لِنَفْسٍ أَن تُؤْمِنَ إِلَّا بِإِذْنِ اللَّهِ ۚ وَيَجْعَلُ الرِّجْسَ عَلَى الَّذِينَ لَا يَعْقِلُونَ
اور کوئی شخص اللہ کی مرضی (٦٤) کے بغیر ایمان نہیں لاسکتا، اور وہ کفر و شرک کی ناپاکی میں انہی لوگوں کو ملوث کرتا ہے جو عقل سے بے بہرہ ہوتے ہیں۔
اللہ کے اذن کا مفہوم: یعنی اللہ کی توفیق اور منظوری کے بغیر کسی کو ایمان کی نصیحت نصیب نہیں ہوتی۔ ہاں وہ شخص جو حق کی تلاش میں عقل سے کام لے اور ہر طرح کسے تعصب اور خارجی نظریات سے ذہن کو پاک کرکے اللہ کی آیات میں خالی الذہن ہو کر غور و فکر کرے، ایسے شخص کو اللہ تعالیٰ یقینا حق کی راہ دکھا دیتا ہے اور ایمان لانے کی توفیق بھی بخشتا ہے اور اسی کا نام اللہ کا اذن ہے۔ اور جو اللہ کی قدرت، اللہ کی برہان اللہ کے احکام کی آیتوں میں غور و فکر نہیں کرتے، وہ ان کے دلوں کو نجس اور گندہ کر دیتا ہے۔ ان کی قسمت میں جہالت، گمراہی، غلط کاری، کفرو شرک کی نجاستوں کے سوا کچھ نہیں ہوتا۔