سورة یونس

الر ۚ تِلْكَ آيَاتُ الْكِتَابِ الْحَكِيمِ

الر (١) یہ حکمت والی کتاب (قرآن کریم) کی آیتیں ہیں۔

یہ سورت مکی ہے اور اس کے مخاطب وہ قریش مکہ ہیں جو اللہ کے بارے میں بھی غلط قسم کا تصور رکھتے ہیں اور آخرت پر بھی ایمان نہیں رکھتے۔ اور آپ کی دعوت قبول کرنے کے بجائے قرآنی آیات اور اسلام کی تعلیم پر طرح طرح کے اعتراضات کر رہے تھے۔ الحکیم، یہ قرآن مجید کی صفت ہے۔ اور اس کے اور بھی کئی معنی کیے گئے ہیں۔ مثلاً المحکم، یعنی حلال و حرام، حدود احکام میں محکم (مضبوط) ہے حکیم کے معنی حاکم بھی ہے یعنی اختلافات میں لوگوں کے درمیان فیصلہ کرنے والی کتاب (البقرۃ:۲۳) حکیم کے معنی محکوم فیہ بھی ہے یعنی اللہ تعالیٰ نے اس میں عدل و انصاف کے ساتھ فیصلے کیے ہیں۔