سورة البقرة

إِذْ قَالَ لَهُ رَبُّهُ أَسْلِمْ ۖ قَالَ أَسْلَمْتُ لِرَبِّ الْعَالَمِينَ

(یاد کرو) جب ابراہیم سے اس کے رب نے کہا کہ (اے ابراہیم) تو اپنے رب کا اطاعت گذار بندہ (١٩٣) بن جا، تو اس نے کہا کہ میں رب العالمین کا اطاعت گذار بن گیا

(ف3) ان آیات میں یہ بتایا ہے کہ حضرت ابراہیم کس قدر سلیم الفطرت تھے ، صحیح بات مانتے ہیں انہیں کبھی تامل نہیں ہوا ، خدا نے جب انہیں اسلام و توحید کی دعوت دی تو ابراہیم فورا ﴿أَسْلَمْتُ﴾ پکار اٹھے اور اس کے بعد ساری زندگی تسلیم و رضا کی زندگی ہے ۔ خواب میں بھی دیکھ پایا کہ خدا کی راہ میں بچے کی قربانی ضروری ہے ۔ تو آمادہ ہوگئے اور بیٹے کی گردن پر چھری رکھ دی ، قوم نے جب مخالفت کی اور ﴿حَرِّقُوهُ ﴾کی صدائیں چاروں طرف سے آنے لگیں اس وقت آپ ڈرے نہیں تسلیم و رضا کا پیکر بنے ہوئے آگ میں کود پڑے ۔