سورة الصافات

فَاسْتَفْتِهِمْ أَهُمْ أَشَدُّ خَلْقًا أَم مَّنْ خَلَقْنَا ۚ إِنَّا خَلَقْنَاهُم مِّن طِينٍ لَّازِبٍ

پس اے میرے نبی ! ذرا آپ ان سے پوچھئے (٥) تو سہی کہ کیا ان کا (دوبارہ) پیدا کرنا زیادہ مشکل کام ہے، یا ہماری ان مخلوقات کا جنہیں ہم پیدا کرچکے ہیں، بے شک ہم نے انہیں چپکنے والی مٹی سے پیدا کیا ہے

ایسے انتظامات کو زیر نظر رکھ کر کوئی صاحب عقل سلیمہ کہہ سکتا ہے کہ دوسری دفعہ پیدا کرنا اللہ پر کوئی مشکل امر ہے؟ پس تو اے نبی ! ان سے دریافت کر کہ ان کا دوبارہ پیدا کرنا بہت زیادہ مشکل ہے ؟ یا ان چیزوں کا پیدا کرنا جن کو ہم بنا چکے ہیں ؟ کچھ شک نہیں کہ ہم (اللہ) نے ان کو شروع پیدائش کے وقت لیسدار مٹی سے پیدا کیا ہے تو کیا جس کو ایک دفعہ بنایا ہو دوبارہ اس کا بنانا زیادہ مشکل ہے ؟ ہرگز نہیں بلکہ آسان ہے