وَهُوَ الَّذِي خَلَقَ السَّمَاوَاتِ وَالْأَرْضَ فِي سِتَّةِ أَيَّامٍ وَكَانَ عَرْشُهُ عَلَى الْمَاءِ لِيَبْلُوَكُمْ أَيُّكُمْ أَحْسَنُ عَمَلًا ۗ وَلَئِن قُلْتَ إِنَّكُم مَّبْعُوثُونَ مِن بَعْدِ الْمَوْتِ لَيَقُولَنَّ الَّذِينَ كَفَرُوا إِنْ هَٰذَا إِلَّا سِحْرٌ مُّبِينٌ
اور اسی نے آسمانوں اور زمین کو چھ دنوں میں پیدا (٧) کیا ہے، اور اس کے پہلے اس کا عرش پانی پر تھا، تاکہ تمہیں آزما کر دیکھے کہ تم میں عمل کے اعتبار سے کون زیادہ اچھا ہے، اور اگر آپ کہیں گے کہ تم لوگ موت کے بعد دوبارہ اٹھائے (٨) جاؤ گے، تو کافر کہیں گے کہ یہ قرآن کھلا جادو ہے۔
تخلیق کائنات کا تذکرہ اللہ تعالیٰ بیان فرماتا ہے کہ ’ اسے ہر چیز پر قدرت ہے ۔ آسمان و زمین کو اس نے صرف چھ دن میں پیدا کیا ہے ۔ اس سے پہلے اس کا عرش کریم پانی کے اوپر تھا ‘ ۔ مسند احمد میں { رسول اللہ صلی اللہ علیہ وسلم نے فرمایا : ” اے بنو تمیم ! تم خوشخبری قبول کرو “ ۔ انہوں نے کہا خوشخبریاں تو آپ صلی اللہ علیہ وسلم نے سنا دیں اب کچھ دلوائیے ۔ آپ صلی اللہ علیہ وسلم نے فرمایا : ” اے اہل یمن تم قبول کرو “ ۔ انہوں نے کہا ہاں ہمیں قبول ہے ۔ مخلوق کی ابتداء تو ہمیں سنائیے کہ کس طرح ہوئی ؟ آپ صلی اللہ علیہ وسلم نے فرمایا : ” سب سے پہلے اللہ تھا ۔ اس کا عرش پانی کے اوپر تھا “ ۔ اس نے لوح محفوظ میں ہر چیز کا تذکرہ لکھا راوی حدیث سیدنا عمران رضی اللہ عنہ کہتے ہیں نبی کریم صلی اللہ علیہ وسلم نے اتنا ہی فرمایا تھا جو کسی نے آن کر مجھے خبر دی کہ تیری اونٹنی زانو کھلوا کر بھاگ گئی ، میں اسے ڈھونڈنے چلا گیا ۔ پھر مجھے نہیں معلوم کہ کیا بات ہوئی ؟ } یہ حدیث بخاری مسلم میں بھی ہے ۔ ۱؎ (صحیح بخاری:3191) ایک روایت میں ہے { اللہ تھا اور اس سے پہلے کچھ نہ تھا } ۔ ۱؎ (صحیح بخاری:3191) ایک روایت میں ہے { اس کے ساتھ کچھ نہ تھا ۔ اس کا عرش پانی پر تھا ۔ اس نے ہرچیز کا تذکرہ لکھا ۔ پھر آسمان و زمین کو پیدا کیا } ۔ ۱؎ (صحیح بخاری:3191) مسلم کی حدیث میں ہے { زمین و آسمان کی پیدائش سے پچاس ہزار سال پہلے اللہ تعالیٰ نے مخلوقات کی تقدیر لکھی اس کا عرش پانی پر تھا } ۔ ۱؎ (صحیح مسلم:2653) صحیح بخاری میں اس آیت کی تفسیر کے موقع پر ایک قدسی حدیث لائے ہیں کہ { اے انسان ! تو میری راہ میں خرچ کر میں تجھے دوں گا اور فرمایا ’ اللہ کا ہاتھ اوپر ہے ‘ ۔ دن رات کا خرچ اس میں کوئی کمی نہیں لاتا ۔ خیال تو کرو کہ آسمان و زمین کی پیدائش سے اب تک کتنا کچھ خرچ کیا ہو گا لیکن اس کے داہنے ہاتھ میں جو تھا وہ کم نہیں ہوتا اس کا عرش پانی پر تھا ۔ اس کے ہاتھ میں میزان ہے جھکاتا ہے اور اونچا کرتا ہے } ۱؎ (صحیح بخاری:4684) مسند میں ہے { ابورزین لقیط بن عامر بن متفق عقیلی نے نبی کریم صلی اللہ علیہ وسلم سے سوال کیا کہ مخلوق پیدائش کرنے سے پہلے ہمارا پروردگار کہاں تھا ؟ آپ صلی اللہ علیہ وسلم نے فرمایا : ” عما میں نیچے بھی ہوا اور اوپر بھی ہوا پھر عرش کو اس کے بعد پیدا کیا “ } ۔ ۱؎ (سنن ترمذی:3109،قال الشیخ الألبانی:ضعیف) یہ روایت ترمذی کتاب التفسیر میں بھی ہے ۔ سنن ابن ماجہ میں بھی ہے ۔ امام ترمذی اسے حسن کہتے ہیں ۔ مجاہد رحمہ اللہ کا قول ہے کہ ” کسی چیز کو پیدا کرنے سے پہلے عرش الٰہی پانی پر تھا “ ۔ وہب ، ضمرہ ، قتادہ ، ابن جریر رحمہ اللہ علیہم وغیرہ بھی یہی کہتے ہیں ۔ قتادہ رحمہ اللہ کہتے ہیں ” اللہ تعالیٰ بتاتا ہے کہ آسمان و زمین کی پیدائش سے پہلے ابتداء مخلوق کس طرح ہوئی “ ۔ ربیع بن انس کہتے ہیں کہ اس کا عرش پانی پر تھا ۔ جب آسمان و زمین کو پیدا کیا تو اس پانی کے دوحصے کر دیئے ۔ نصف عرش کے نیچے یہی بحر مسجود ہے ۔ سیدنا ابن عباس رضی اللہ عنہما فرماتے ہیں ” بوجہ بلندی کے عرش کو عرش کہا جاتا ہے “ ۔ سعد طائی فرماتے ہیں کہ ” عرش سرخ یاقوت کا ہے “ ۔ محمد بن اسحاق فرماتے ہیں اللہ اسی طرح تھا جس طرح اس نے اپنے نفس کریم کا وصف کیا ۔ اس لیے کہ کچھ نہ تھا ، پانی تھا ، اس پر عرش تھا ، عرش پر «ذُو الْجَلَالِ وَالْإِکْرَامِ ، وَالْعِزَّۃِ وَالسٰلْطَانِ ، وَالْمُلْکِ وَالْقُدْرَۃِ ، وَالْحِلْمِ وَالْعِلْمِ ، وَالرَّحْمَۃِ وَالنِّعْمَۃِ ، الْفَعَّالُ لِمَا یُرِیدُ» تھا جو جو چاہے کر گزرنے والا ہے “ ۔ سیدنا ابن عباس رضی اللہ عنہ سے اس آیت کے بارے میں سوال ہوا کہ ” پانی کس چیز پر تھا ؟ “ آپ نے فرمایا ” ہوا کی پیٹھ پر “ ۔ پھر فرماتا ہے ، ’ آسمان و زمین کی پیدائش تمہارے نفع کے لیے ہے اور تم اس لیے ہو کہ اسی ایک خالق کی عبادت کرو ، اس کے ساتھ کسی کو شریک نہ کرو ۔ یاد رکھو تم بے کار پیدا نہیں کئے گئے ۔ آسمان و زمین اور ان کے درمیان چیزیں باطل پیدا نہیں کیں یہ گمان تو کافروں کا ہے اور کافروں کے لیے آگ کا عذاب ‘ ۔ اور آیت میں ہے «اَفَحَسِبْتُمْ اَنَّمَا خَلَقْنٰکُمْ عَبَثًا وَّاَنَّکُمْ اِلَیْنَا لَا تُرْجَعُوْنَ فَتَعَالَی اللہُ الْمَلِکُ الْحَقٰ لَا إِلٰہَ إِلَّا ہُوَ رَبٰ الْعَرْشِ الْکَرِیمِ» ۱؎ (23-المؤمنون:116 ، 115) ’ کیا تم یہ سمجھ بیٹھے ہو کہ ہم نے تمہیں عبث پیدا کیا ہے اور تم ہماری طرف لوٹائے نہ جاؤ گے ؟ اللہ جو سچا مالک ہے وہی حق ہے اس کے سوا کوئی معبود نہیں وہ عرش کریم کا رب ہے ‘ ۔ اور آیت میں ہے «وَمَا خَلَقْتُ الْجِنَّ وَالْإِنسَ إِلَّا لِیَعْبُدُونِ» ۱؎ (51-الذاریات:56) ’ انسانوں اور جنوں کو میں نے صرف اپنی عبادت کے لیے ہی پیدا کیا ہے وہ تمہیں آزما رہے ہیں کہ تم میں سے اچھے عمل والے کون ہیں ؟ ‘ یہ نہیں فرمایا کہ زیادہ عمل والے کون ہیں ؟ اس لیے کہ عمل حسن وہ ہوتا ہے جس میں خلوص ہو اور شریعت محمدیہ صلی اللہ علیہ وسلم کی تابعداری ہو ۔ ان دونوں باتوں میں سے اگر ایک بھی نہ ہو تو وہ عمل بے کار اور غارت ہے ۔ پھر فرماتا ہے کہ ’ اے نبی ! اگر آپ انہیں کہیں کہ تم مرنے کے بعد زندہ کئے جاؤ گے جس اللہ نے تمہیں پہلی بار پیدا کیا ہے وہ دوبارہ بھی پیدا کرے گا تو صاف کہہ دیں گے کہ ہم اسے نہیں مانتے حالانکہ قائل بھی ہیں کہ زمین آسمان کا پیدا کرنے والا اللہ تعالیٰ ہی ہے ‘ ۔ ظاہر ہے کہ شروع جس پر گراں نہ گزرا ۔ اس پر دوبارہ کی پیدائش کیسے گراں گزرے گی ؟ یہ توبہ نسبت اول مرتبہ کے بہت ہی آسان ہے ۔ فرمان الٰہی ہے «وَہُوَ الَّذِیْ یَبْدَؤُا الْخَــلْقَ ثُمَّ یُعِیْدُہٗ وَہُوَ اَہْوَنُ عَلَیْہِ وَلَہُ الْمَثَلُ الْاَعْلٰی فِی السَّمٰوٰتِ وَالْاَرْضِ وَہُوَ الْعَزِیْزُ الْحَکِیْمُ» ۱؎ (30-الروم:27) ’ اسی نے پہلی پیدائش شروع میں کی وہی دوبارہ پیدائش کرے گا اور یہ تو اس پر نہایت ہی آسان ہے ‘ ۔ اور آیت میں ہے کہ «مَا خَلْقُکُمْ وَلَا بَعْثُکُمْ إِلَّا کَنَفْسٍ وَاحِدَۃٍ» ۱؎ (31-لقمان:28) ’ تم سب کا بنانا اور مار کر زندہ کرنا مجھ پر ایسا ہی ہے جیسا ایک کا ‘ ۔ لیکن یہ لوگ اسے نہیں مانتے تھے اور اسے کھلے جادو سے تعبیر کرتے تھے ۔ کفر و عناد سے اس قول کو جادو کا اثر خیال کرتے ۔ پھر فرماتا ہے کہ ’ اگر ہم عذاب و پکڑ کو ان سے کچھ مقرر مدت تک کے لیے مؤخر کر دیں تو یہ اس کو نہ آنے والا جان کر جلدی کا مطالبہ کرنے لگتے ہیں کہ عذاب ہم سے مؤخر کیوں ہو گئے ؟ ان کے دل میں کفر و شرک اس طرح بیٹھ گیا ہے کہ اس سے چھٹکارا ہی نہیں ملتا ‘ ۔ امت کا لفظ قرآن و حدیث میں کئی ایک معنی میں مستعمل ہے ۔ اس سے مراد مدت بھی ہے اس آیت اور «وَقَالَ الَّذِیْ نَجَا مِنْہُمَا وَادَّکَرَ بَعْدَ اُمَّۃٍ اَنَا اُنَبِّئُکُمْ بِتَاْوِیْـلِہٖ فَاَرْسِلُوْنِ» ۱؎ (12-یوسف:45) جو سورۃ یوسف میں ہے یہی معنی ہیں ۔ امام و مقتدی کے معنی میں بھی یہ لفظ آیا ہے ۔ جیسے ابراہیم علیہ السلام کے بارے میں «اِنَّ اِبْرٰہِیْمَ کَانَ اُمَّۃً قَانِتًا لِّلّٰہِ حَنِیْفًا وَلَمْ یَکُ مِنَ الْمُشْرِکِیْنَ» رضی اللہ عنہ (16-النحل:120) آیا ہے ۔ ملت اور دین کے بارے میں بھی یہی لفظ آتا ہے جیسے «إِنَّا وَجَدْنَا آبَاءَنَا عَلَی أُمَّۃٍ وَإِنَّا عَلَی آثَارِہِمْ مُقْتَدُونَ» ۱؎ (43-الزخرف:23) ہے جماعت کے معنی میں بھی آتا ہے «وَجَدَ عَلَیْہِ اُمَّۃً مِّنَ النَّاسِ یَسْقُوْنَ وَوَجَدَ مِنْ دُوْنِہِمُ امْرَاَتَیْنِ» ۱؎ (28-القص:23) والی آیت میں اور آیت «وَلَقَدْ بَعَثْنَا فِیْ کُلِّ اُمَّۃٍ رَّسُوْلًا اَنِ اعْبُدُوا اللّٰہَ وَاجْتَنِبُوا» (16-النحل:36) میں اور آیت «وَلِکُلِّ أُمَّۃٍ رَسُولٌ فَإِذَا جَاءَ رَسُولُہُمْ قُضِیَ بَیْنَہُمْ بِالْقِسْطِ وَہُمْ لَا یُظْلَمُونَ» ۱؎ (10-یونس:47) ان آیتوں میں امت سے مراد کافر مومن سب امتی ہیں ۔ جیسے مسلم کی حدیث ہے { اس کی قسم جس کے ہاتھ میں میری جان ہے اس امت کا جو یہودی نصرانی میرا نام سنے اور مجھ پر ایمان نہ لائے وہ جہنمی ہے } ۔ ۱؎ (صحیح مسلم:153) ہاں تابعدار امت وہ ہے جو رسولوں کو مانے ۔ جیسے «کُنْتُمْ خَیْرَ اُمَّۃٍ اُخْرِجَتْ للنَّاسِ» ۱؎ (3-آل عمران:110) والی آیت میں ۔ صحیح حدیث میں ہے { میں کہوں گا «أُمَّتِی أُمَّتِی» } ۔ ۱؎ (صحیح بخاری:7510) اسی طرح امت کا لفظ فرقے اور گروہ کے لیے بھی مستعمل ہوتا ہے جیسے «وَمِنْ قَوْمِ مُوْسٰٓی اُمَّۃٌ یَّہْدُوْنَ بالْحَقِّ وَبِہٖ یَعْدِلُوْنَ» ۱؎ (7-الأعراف:159) اور جیسے «مِنْ اَھْلِ الْکِتٰبِ اُمَّۃٌ قَایِٕمَۃٌ یَّتْلُوْنَ اٰیٰتِ اللّٰہِ اٰنَاءَ الَّیْلِ وَھُمْ یَسْجُدُوْنَ» ۱؎ (3-آل عمران:113) میں ۔