سورة القمر

حِكْمَةٌ بَالِغَةٌ ۖ فَمَا تُغْنِ النُّذُرُ

(ان میں) دانائی کی باتیں ہیں جو اتمام حجت کو کافی ہیں لیکن یہ تنبیہات ان کے کسی کام [٥] نہ آئیں۔

حِكْمَةٌۢ بَالِغَةٌ فَمَا تُغْنِ النُّذُرُ: ’’ بَالِغَةٌ ‘‘ کا لفظی معنی پہنچنے والی ہے، مراد انتہا اور کمال کو پہنچی ہوئی حکمت ہے۔ ’’ النُّذُرُ ‘‘ ’’نَذِيْرٌ‘‘ کی جمع ہے، ڈرانے والی چیزیں۔ ’’نَذِيْرٌ‘‘ مصدر بھی ہو سکتا ہے، جس طرح ’’نَكِيْرٌ‘‘ ہے، یعنی تنبیہات، ڈراوے۔ ’’ حِكْمَةٌ ‘‘ پچھلی آیت میں مذکور ’’ مَا فِيْهِ مُزْدَجَرٌ ‘‘ سے بدل ہے۔ یعنی پچھلی امتوں کے واقعات میں سے وہ واقعات جن میں کفر و تکذیب سے باز آنے کا سامان موجود ہے، کامل حکمت اور دانائی کی باتیں ہیں، مگر یہ ڈرانے اور خبردار کرنے والی چیزیں نہ ماننے والوں کو کچھ فائدہ نہیں دیتیں۔ دیکھیے سورۂ یونس ( ۱۰۱)۔