سورة الصافات

وَإِن كَانُوا لَيَقُولُونَ

اور یہ لوگ تو کہا کرتے تھے کہ :

’’ وَ اِنْ كَانُوْا لَيَقُوْلُوْنَ ‘‘ اصل میں ’’وَ إِنَّهُمْ كَانُوْا يَقُوْلُوْنَ‘‘ تھا۔ دلیل اس کی ’’ لَيَقُوْلُوْنَ ‘‘ پر آنے والا لام ہے، جس کی وجہ سے ’’إِنَّ‘‘ کو ’’إِنْ‘‘ کر دیا اور ’’هُمْ‘‘ کو حذف کر دیا۔ ان آیات کی تفسیر کے لیے دیکھیے سورۂ فاطر (۴۲) اور سورۂ انعام (۱۵۶، ۱۵۷) یعنی یہ لوگ کہا کرتے تھے کہ گزشتہ لوگوں کی طرح ہمارے پاس کوئی پیغمبر آتا، یا ہم پر اللہ کی طرف سے کوئی کتاب نازل ہوتی تو ہم اللہ کے چنے ہوئے بندے ہوتے۔ مگر جب یہ کتاب ان کے پاس آ گئی تو انھوں نے اسے قبول کرنے سے انکار کر دیا۔ اب اس انکار کا نتیجہ وہ بہت جلدی جان لیں گے۔