سورة القمر - آیت 45

سَيُهْزَمُ الْجَمْعُ وَيُوَلُّونَ الدُّبُرَ

ترجمہ تیسیر القرآن - مولانا عبدالرحمن کیلانی صاحب

ان کی یہ جماعت جلد ہی شکست کھا جائے گی اور پیٹھ دکھا کر [٣١] بھاگ کھڑے ہوں گے۔

تیسیر الرحمن لبیان القرآن - محمد لقمان السلفی رحمہ اللہ

چنانچہ ایسا ہی ہوا کہ وہ میدان بدر میں بدترین شکست سے دوچار ہوئے اور کفر و شرک کے بڑے بڑے سرداران مسلمانوں کی تلواروں کے ذریعہ گاجر مولی کی طرح کاٹ دیئے گئے۔ مفسرین لکھتے ہیں کہ یہ آیت نبی کریم (ﷺ) کی صداقت کی دلیل ہے، اس لئے کہ یہ مکہ میں نازل ہوئی تھی، جس میں یہ غیبی خبر دی گئی تھی کہ کفار قریش کی شکست ہوگی اور وہ میدان جنگ چھوڑ کر بھاگیں گے اور اس کی تصدیق 2 ھ میں غزوہ بدر کے ذریعہ ہوئی۔ امام بخاری نے ابن عباس (رض) سے روایت کی ہے کہ نبی کریم (ﷺ) نے میدان بدر میں پورے الحاح کے ساتھ اپنے رب سے مسلمانوں کی کامیابی کے لئے دعا کی، پھر اپنے خیمے سے جست لگا کر اس سورت کی یہی دونوں آیتیں پڑھتے ہوئے نکلے۔