سورة الذاريات - آیت 59

فَإِنَّ لِلَّذِينَ ظَلَمُوا ذَنُوبًا مِّثْلَ ذَنُوبِ أَصْحَابِهِمْ فَلَا يَسْتَعْجِلُونِ

ترجمہ تیسیر القرآن - مولانا عبدالرحمن کیلانی صاحب

سو ان ظالموں (کے گناہوں) کا ڈول [٥١] بھی ایسے ہی بھر چکا ہے جسے ان جیسے دوسرے لوگوں کا بھر گیا تھا۔ لہٰذا یہ مجھ سے جلدی کا مطالبہ نہ کریں

تیسیر الرحمن لبیان القرآن - محمد لقمان السلفی رحمہ اللہ

(25) جن مشرکین مکہ نے نبی کریم (ﷺ) کی تکذیب اور کفر و شرک اور فساد و سرکشی پر اصرار کر کے اپنے آپ پر ظلم کیا ہے، وہ لوگ گزشتہ زمانوں میں ہلاک کی جانے والی قوموں کی طرح بڑے عذاب کے سزا وار ہوگئے ہیں، وہ جلدی نہ کریں، اسے ضرور آنا ہے اور وقت مقرر پر آنا ہے، اللہ نے اپنی معلوم حکمت کی وجہ سے اسے مؤخر کر رکھا ہے، جب اس کا وقت آجائے گا تو اسے کوئی ٹال نہ سکے گا اور وہ بڑا ہی درد ناک عذاب ہوگا،