وَإِذْ صَرَفْنَا إِلَيْكَ نَفَرًا مِّنَ الْجِنِّ يَسْتَمِعُونَ الْقُرْآنَ فَلَمَّا حَضَرُوهُ قَالُوا أَنصِتُوا ۖ فَلَمَّا قُضِيَ وَلَّوْا إِلَىٰ قَوْمِهِم مُّنذِرِينَ
اور (وہ واقعہ بھی یاد کیجئے) جب ہم جنوں کے ایک گروہ کو آپ کی طرف لے آئے تھے جو قرآن سن [٤١] رہے تھے۔ جب وہ اس مقام پر آ پہنچے تو (ایک دوسرے سے) کہنے لگے : خاموش ہوجاؤ۔ پھر جب قرآن پڑھا [٤٢] جاچکا تو وہ ڈرانے والے بن کر اپنی قوم کے پاس واپس [٤٣] آئے۔
(20) مفسرین لکھتے ہیں کہ ان آیات سے مقصود یہ بیان کرنا ہے کہ نبی کریم (ﷺ) انسانوں کی طرح جنوں کے بھی نبی بنا کر بھیجے گئے تھے اور جنوں نے آپ کی زبانی قرآن کریم سنا اور ان میں سے جنہیں اللہ نے توفیق دی وہ آپ (ﷺ) پر ایمان لے آئے اور حلقہ بگوش اسلام ہوگئے۔ اللہ تعالیٰ نے نبی کریم (ﷺ) کو مخاطب کر کے فرمایا ہے کہ آپ کفار مکہ سے اس دن کا ذکر کردیجیے جب ہم نے جنوں کی ایک جماعت کو آپ کے پاس پہنچا دیا، تاکہ آپ کی زبانی قرآن کریم سنیں جب وہ آپ کے پاس پہنچے تو آپ قرآن کی تلاوت کر رہے تھے، انہوں نے ایک دوسرے سے کہا کہ سب خاموشی اختیار کریں اور قرآن کو غور سے سنیں آپ کی تلاوت سن کر جن بہت متاثر ہوئے اور آپ پر ایمان لے آئے،