سورة المآئدہ

وَإِذْ أَوْحَيْتُ إِلَى الْحَوَارِيِّينَ أَنْ آمِنُوا بِي وَبِرَسُولِي قَالُوا آمَنَّا وَاشْهَدْ بِأَنَّنَا مُسْلِمُونَ

اور جب میں نے حواریوں کو اشارہ کیا کہ وہ مجھ پر اور میرے رسول پر ایمان لائیں۔ تب وہ حضرت عیسیٰ سے کہنے لگے : ہم ایمان لاتے ہیں اور آپ گواہ رہیے کہ ہم حکم ماننے والے [١٦٠] ہیں۔

حواریوں سے مراد: حضرت عیسیٰ علیہ السلام کے وہ پیروکار ہیں جو ان پر ایمان لائے اور ان کے ساتھی اور مددگار رہے ان کی تعداد بارہ بیان کی جاتی ہے۔ وحی سے مراد جو اللہ کی طرف سے بعض لوگوں کے دلوں میں القاکردی جاتی ہے۔ جیسے حضرت موسیٰ علیہ السلام کی والدہ اور حضرت مریم کو اسی قسم کا الہام ہوا جسے قرآن نے وحی سے ہی تعبیر کیا ۔ ان حواریوں نے حضرت عیسیٰ سے کہا کہ ہم آپ پر ایمان لاتے ہیں اورآپ کا حکم ماننے والے ہیں آپ گواہ رہیے۔