سورة القدر

وَمَا أَدْرَاكَ مَا لَيْلَةُ الْقَدْرِ

اور آپ کو کیا معلوم کہ شب قدر کیا ہے؟

ابن عباس كا قول ہے كہ پورا قرآن لوح محفوظ سے آسمان اول پر بیت العزت میں اس رات اترا، پھر تفصیل وار واقعات كے مطابق بتدریج تیئیس سال میں رسول اللہ صلی اللہ علیہ وسلم پر نازل ہوا۔ (تفسیر طبری: ۲۴/ ۵۳۱۔۵۳۲) لیلة القدر كونسی رات ہے: سیدنا عبادہ بن صامت رضی اللہ عنہ كہتے ہیں كہ آپ صلی اللہ علیہ وسلم اپنے حجرے سے نكلے۔ آپ لوگوں كو لیلة القدر بتانا چاہتے تھے اتنے میں دو مسلمان لڑ پڑے، آپ نے فرمایا، میں اس لیے نكلا تھا كہ تمہیں لیلة القدر بتاؤں مگر فلاں فلاں لڑ پڑے تو وہ بات میرے دل سے اٹھا لی گئی اور اسی میں شاید تمہاری بہتری تھی۔ اب تم اسے آخری عشرہ كی طاق راتوں میں تلاش كرو۔