لِلْفُقَرَاءِ الْمُهَاجِرِينَ الَّذِينَ أُخْرِجُوا مِن دِيَارِهِمْ وَأَمْوَالِهِمْ يَبْتَغُونَ فَضْلًا مِّنَ اللَّهِ وَرِضْوَانًا وَيَنصُرُونَ اللَّهَ وَرَسُولَهُ ۚ أُولَٰئِكَ هُمُ الصَّادِقُونَ
(نیز فے کا یہ مال) ان محتاج مہاجرین کے لیے ہے جو اپنے گھروں [١٠]، اور اپنی جائیدادوں سے نکالے گئے۔ وہ اللہ کا فضل اور اس کی رضا چاہتے ہیں اور اللہ اور اس کے رسول کی مدد کرتے ہیں۔ یہی لوگ راستباز ہیں۔
مال فے كے حقدار: مال فئے میں پہلے محتاجوں كا عمومی ذكر فرمایا پھر اس كے بعد بالخصوص ان مہاجر محتاجوں كا ذكر فرمایا، جنھوں نے اسلام اور اللہ كی رضا كی خاطر اپنا گھر بار، مال و دولت، اور جائیدادیں چھوڑ كر مدینہ آگئے جب كہ یہاں ان كی آبادكاری اور معاش كے مسئلہ كا كوئی حل نظر نہیں آرہا تھا۔ انھوں نے ایمان كا دعویٰ كیا تو عملی طور پر اسے سچ كر دكھایا اور وہ ہر وقت اللہ كے دین كی مدد كے لیے تیار بیٹھے ہیں ایسے محتاج عام محتاجوں كی نسبت مال لینے كے زیادہ حقدار ہیں۔