سورة النسآء - آیت 18

وَلَيْسَتِ التَّوْبَةُ لِلَّذِينَ يَعْمَلُونَ السَّيِّئَاتِ حَتَّىٰ إِذَا حَضَرَ أَحَدَهُمُ الْمَوْتُ قَالَ إِنِّي تُبْتُ الْآنَ وَلَا الَّذِينَ يَمُوتُونَ وَهُمْ كُفَّارٌ ۚ أُولَٰئِكَ أَعْتَدْنَا لَهُمْ عَذَابًا أَلِيمًا

ترجمہ تیسیر القرآن - مولانا عبدالرحمن کیلانی صاحب

توبہ ان لوگوں کے لیے نہیں ہے جو برے کام کرتے رہتے ہیں حتیٰ کہ ان میں سے کسی کی موت جب آجاتی ہے تو کہنے لگتا ہے کہ ''میں اب توبہ کرتا ہوں'' اور نہ ہی ان لوگوں کے لئے ہے جو کفر کی حالت میں ہی مرجاتے ہیں [٣١] ایسے لوگوں کے لیے ہم نے دردناک عذاب تیار کر رکھا ہے

تسہیل البیان فی تفسیر القرآن - ام عمران شکیلہ بنت میاں فضل حسین

توبہ ان لوگوں کی قبول نہیں جو بُرائی کرتے چلے جاتے ہیں اورجب وقت نزع میں موت کے فرشتے ان کو نظر آنے لگ جاتے ہیں تو توبہ کا وقت ختم ہوچکا اب وہ دارالعمل سے نکل کر دارالآخرت کی سرحد پر کھڑا ہے۔ اس آیت میں دو طرح کے لوگوں کا ذکر ہے، ایک مسلمان تو تھے مگر ساری عمر گناہ کرتے گزاردی اور دوسرے وہ جو کافر تھے پھر اسی کفر کی حالت میں مرگئے، دونوں طرح کے لوگوں کے لیے درد ناک عذاب ہے۔چار قسم کے لوگ جن کی توبہ کا ذکر ہوا ہے۔ (۱) غلطی سے گناہ کرلیا معلوم ہونے پر توبہ کرلی ایسے لوگوں کی توبہ اللہ ضرور قبول کرتا ہے۔ (۲) وہ لوگ جو گناہ تو غلطی سے کرتے ہیں مگر معلوم ہوجانے پر توبہ میں جلدی نہیں کرتے ایسے لوگوں کی توبہ قبول کرنے کا اللہ نے کوئی وعدہ نہیں کیا۔ (۳) تیسری قسم اس مسلمان کی ہے جسے عمر بھر توبہ کا خیال نہ آیا اور موت کے وقت خیال آیا تو ایسے شخص کے متعلق واضح طور پر فرما دیا کہ اس کی توبہ قبول نہ ہوگی۔ (۴) جو توبہ کیے بغیر کفر کی ہی حالت میں مرگیا اس کی توبہ قبول نہیں ہوگی۔