سورة الصافات

فَأَقْبَلَ بَعْضُهُمْ عَلَىٰ بَعْضٍ يَتَسَاءَلُونَ

یہ لوگ بھی ایک دوسرے کی طرف متوجہ ہو کر سوال کریں گے

جنتی، جنت میں بیٹھے ہوئے دنیا کے واقعات یاد کریں گے اور ایک دوسرے کو سنائیں گے کہ دنیا میں کیا کیا حال گزرے، کیسے کیسے دن کٹے۔ اس پر ایک شخص کہے گا، میری سنو! میرا شیطان میرا ایک مشرک ساتھی تھا جو مجھ سے اکثر کہا کرتا تھا۔ کہ کیا تمھاری بھی مت ماری گئی ہے کہ تم اس بات پر یقین رکھتے ہو کہ جب ہم مر کر مٹی میں مل جائیں گے اور کھوکھلی اور بوسیدہ ہڈیاں بن جائیں گے پھر ہمیں زندہ کر کے ہمارا حساب لیا جائے گا اور پھر اس کے مطابق جزا دی جائے گی؟ پھر وہ جنتی اپنے جنت کے ساتھیوں سے کہے گا کہ کیا تم پسند کرتے ہو کہ ذرا جہنم میں جھانک کر دیکھیں۔ شاید مجھے یہ باتیں کہنے والا وہاں نظر آ جائے تو تمہیں بتلاؤں کہ یہ شخص تھا جو یہ باتیں کرتا تھا۔