سورة آل عمران - آیت 86

كَيْفَ يَهْدِي اللَّهُ قَوْمًا كَفَرُوا بَعْدَ إِيمَانِهِمْ وَشَهِدُوا أَنَّ الرَّسُولَ حَقٌّ وَجَاءَهُمُ الْبَيِّنَاتُ ۚ وَاللَّهُ لَا يَهْدِي الْقَوْمَ الظَّالِمِينَ

ترجمہ تیسیر القرآن - مولانا عبدالرحمن کیلانی صاحب

ایسے لوگوں کو اللہ کیونکر ہدایت دے سکتا ہے جنہوں نے ایمان لانے کے بعد کفر اختیار کیا ؟ حالانکہ وہ خود گواہی دے چکے ہیں کہ یہ رسول حق پر ہے اور ان کے پاس اس بات کے واضح دلائل بھی آچکے ہیں؟ اور اللہ تعالیٰ ایسے [٧٥۔ ١] ناانصاف لوگوں کو ہدایت نہیں دیا کرتا

تسہیل البیان فی تفسیر القرآن - ام عمران شکیلہ بنت میاں فضل حسین

ایمان لانے کے بعد کفر کرنا، رسول اللہ کے بر حق ہونے کی گواہی دینے کے بعد آپ صلی اللہ علیہ وسلم کا انکار کرنا، روشن نشانیوں جو تورات اور انجیل میں بیان کی گئیں تھیں ان کے باوجود انکار کرنا اور یہ انکار نفس پرستی یا خواہشات کی خاطر کیا جائے تو اللہ کا فیصلہ ہے کہ ایسے لوگوں کو ہدایت نہیں ملے گی۔ آج بھی ایسے لوگ موجود ہیں جو یہ مانتے ہیں کہ رسولوں نے جو کچھ کہا وہ حق ہے۔ مگر کہتے ہیں کہ آج کے دور میں اس پر عمل کرنا ممکن نہیں۔ گمراہی کے دور میں اسلام کا دروازہ کس طرح کھلتا ہے: یہ توبہ کا دروازہ ہے جو ہمیشہ کھلا رہتا ہے اسلام یہ چاہتا ہے کہ انسان توبہ کے بعد نیک عمل کرنا شروع کردے۔