سورة البقرة - آیت 198

لَيْسَ عَلَيْكُمْ جُنَاحٌ أَن تَبْتَغُوا فَضْلًا مِّن رَّبِّكُمْ ۚ فَإِذَا أَفَضْتُم مِّنْ عَرَفَاتٍ فَاذْكُرُوا اللَّهَ عِندَ الْمَشْعَرِ الْحَرَامِ ۖ وَاذْكُرُوهُ كَمَا هَدَاكُمْ وَإِن كُنتُم مِّن قَبْلِهِ لَمِنَ الضَّالِّينَ

ترجمہ تیسیر القرآن - مولانا عبدالرحمن کیلانی صاحب

اگر تم حج کے دوران اپنے پروردگار کا فضل [٢٦٧] (رزق وغیرہ) بھی تلاش کرو تو کوئی مضائقہ نہیں۔ پھر جب تم عرفات [٢٦٨] سے واپس آؤ تو مشعر الحرام [٢٦٩] (مزدلفہ) پہنچ کر اللہ کو اس طرح یاد کرو [٢٧٠] جیسے اس نے تمہیں ہدایت کی ہے۔ ورنہ اس سے پہلے تو تم راہ بھولے ہوئے تھے

تسہیل البیان فی تفسیر القرآن - ام عمران شکیلہ بنت میاں فضل حسین

حج میں تجارت: جاہلیت کے غلط اعتقادات میں سے ایک یہ بھی تھا کہ لوگ حج کے دوران تجارت کو مکروہ سمجھتے تھے۔ اور اسے خلوص عمل کے خلاف سمجھتے تھے۔ اس پر یہ آیت نازل ہوئی عبداللہ بن عباس فرماتے ہیں کہ ایام جاہلیت میں منیٰ میں تجارتی بازار لگا کرتے تھے صحابہ نے حج کے دنوں میں تجارت کو گناہ سمجھا تب یہ آیت نازل ہوئی۔ عرفات میں حاضر ہونا حج کا رکن اعظم ہے: سیدنا عبداللہ بن نعیم رضی اللہ عنہ سے روایت ہے کہ آپ رسول اللہ صلی اللہ علیہ وسلم نے تین بار فرمایا کہ حج عرفات کی حاضری ہے، حج عرفات کی حاضری ہے، حج عرفات کی حاضری ہے۔ منیٰ کے تین دن ہیں پھر اگر کوئی شخص جلدی میں ہو اور دو دن میں ہی چلا آئے اس پر بھی کوئی گناہ نہیں اور جو تیسرا دن ٹھہرا رہا اس پر بھی کوئی گناہ نہیں۔‘‘(بخاری: ۴۵۲۱۔ ترمذی: ۲۹۷۵) ۹ذوالحجہ کو زوال آفتاب سے غروب شمس تک میدان عرفات میں وقوف حج کا سب سے بڑا اور اہم رکن ہے۔ یہاں مغرب کی نماز نہیں پڑھنی چاہیے بلکہ مزدلفہ پہنچ کر مغرب کی تین رکعت فرض اور عشاء کی دو رکعت (قصر) جمع کرکے پڑھنی چاہیے مزدلفہ میں مشعر حرام ہے۔ کیونکہ یہ حرم کے اندر ہے یہاں ذکر الٰہی کی تاکید ہے۔ یہاں رات گزارنی ہے فجر کی نماز اول وقت پڑھ کر طلوعِ آفتاب تک ذکر الٰہی میں مشغول رہا جائے پھر طلوع آفتاب کے بعد منیٰ جایا جائے۔