سورة ھود - آیت 45

وَنَادَىٰ نُوحٌ رَّبَّهُ فَقَالَ رَبِّ إِنَّ ابْنِي مِنْ أَهْلِي وَإِنَّ وَعْدَكَ الْحَقُّ وَأَنتَ أَحْكَمُ الْحَاكِمِينَ

ترجمہ تیسیرالقرآن - مولانا عبد الرحمن کیلانی

نوح نے اپنے پروردگار کو پکارا اور کہا : ''میرا بیٹا تو میرے اہل سے تھا اور تیرا وعدہ بھی سچا ہے اور تو ہی سب سے بہتر فیصلہ کرنے والا ہے

تسہیل البیان فی تفسیر القرآن - ام عمران شکیلہ بنت میاں فضل حسین

بدکردار بیٹا بھی نبی کا اہل نہیں ہو سکتا: جب حضرت نوح علیہ السلام کے دیکھتے ہی دیکھتے ان کا بیٹا غرق ہو گیا تو آزردہ ہو گئے اور اللہ سے اس انداز میں التجا کی: ’’یا اللہ تیرا وعدہ تھا کہ میں تیرے اہل کو بچا لوں گا اور وعدہ بھی سچا اور تیرا فیصلہ بھی سب حاکموں سے بہتر، اور یہ غرق ہونے والا بھی تومیرے اہل میں سے ہی تھا پھر اس کے غرق کرنے میں کیا حکمت تھی۔