سورة الاعراف

إِنَّ الَّذِينَ اتَّقَوْا إِذَا مَسَّهُمْ طَائِفٌ مِّنَ الشَّيْطَانِ تَذَكَّرُوا فَإِذَا هُم مُّبْصِرُونَ

بلاشبہ جو لوگ اللہ سے ڈرتے ہیں انہیں جب کوئی شیطانی وسوسہ چھو بھی [١٩٩] جاتا ہے تو چونک پڑتے ہیں اور فوراً صحیح صورت حال دیکھنے لگتے ہیں

جو لوگ اللہ سے ڈرنے والے ہیں، نیکیاں کرنے والے اور بُرائیوں سے رُوکنے والے ہیں، انھیں جب کبھی غصہ آجائے یا شیطان کا وار ان پر چل جائے، یعنی شیطا ن ان کے دل میں کسی گناہ کی رغبت ڈالے تو یہ فوراََ چو کنے ہوجاتے ہیں تو بہ کرلیتے ہیں۔اللہ کی طرف جُھک جاتے ہیں، اور اللہ سے شیطانی شر سے پناہ مانگتے ہیں ۔ ابن مردویہ نے روایت کیا ہے کہ ایک عورت آپ صلی اللہ علیہ وسلم کے پاس آئی جسے مرگی کادورہ پڑا کرتا تھا اس نے درخواست کی کہ آپ میرے لیے دعا کیجئے آپ نے فرمایا اگر تم چاہو تو میں دعُا کروں اور اللہ تمہیں شفابخشے اور اگر چاہوتو صبر کرو تو اللہ تم سے حساب نہ لے گا،اُس نے کہا حضور صلی اللہ علیہ وسلم میں صبر کرتی ہوں کہ میرا حساب معاف ہوجائے۔ سنن میں بھی یہ حدیث ہے صبر کرو تو تمہیں جنت ملے گی، اس نے کہا میں صبر کرتی ہوں کہ مجھے جنت ملے، لیکن اتنی دُعا ضرور کیجئے کہ میں بے پردہ نہ ہو جایا کروں آپ نے دُعا کی چنانچہ ان کا کپڑا کیسی ہی وہ تلملا تیں جگہ سے نہ ہٹتا۔ (بخاری: ۵۶۵۲، مسلم: ۲۵۷۶) حافظ ابن عسا کر رحمہ اللہ بیان کرتے ہیں ا یک عابد نوجوان مسجد میں رہا کرتا تھا، ایک عورت نے اُس پر ڈورے ڈالنے شروع کیئے یہاں تک کہ وہ اسکی کو ٹھری میں چلا گیا کہ اُسے اچانک یہ آیت ’’اِذَا مَسَّھُمْ‘‘ یاد آئی تو غش کھا کر گر پڑا بہت دیر بعد جب ہوش آیا تو پھر اس نے آیت کو یاد کیا اور اسقدر اللہ کا خو ف اس کے دل میں سمایا کہ اسکی جان نکل گئی، حضرت فاروق رضی اللہ عنہ نے اسکے والد سے ہمدردی اور غم خواری کی لوگوں کے ساتھ آپ انکی قبر پر گئے وہا ں جا کر نماز جنازہ ادا کی اور آواز دے کر فرمایا (وَلِمَنْ خَافَ مَقَامَ رَبِّہِ جَنَّتَانِ) جو شخص اپنے رب کے سامنے کھڑا ہونے سے ڈر رکھے اس کے لیے دو دو جنتیں ہیں، اسی وقت قبر کے اندر سے آواز آئی کہ مجھے میرے رب عزوجل نے دونوں مرتبے دو دو عطا فرما دیے۔یہ تو حال تھا اللہ والوں اور پرہیز گاروں کا کہ وہ شیطانی جھٹکوں سے بچ جاتے ہیں اسکے فریب سے چھوٹ جاتے ہیں۔ (ابن کثیر: ۲/ ۴۴۸)