أَمَّن يَهْدِيكُمْ فِي ظُلُمَاتِ الْبَرِّ وَالْبَحْرِ وَمَن يُرْسِلُ الرِّيَاحَ بُشْرًا بَيْنَ يَدَيْ رَحْمَتِهِ ۗ أَإِلَٰهٌ مَّعَ اللَّهِ ۚ تَعَالَى اللَّهُ عَمَّا يُشْرِكُونَ
بھلا کون ہے؟ جو تمہیں خشکی اور سمندر کی تاریکیوں [٦٧] میں راہ دکھاتا ہے اور اپنی رحمت سے پیشتر ہواؤں کو بشارت کے طور پر [٦٨] بھیجتا ہے؟ کیا اللہ کے ساتھ کوئی اور الٰہ ہے؟ اللہ اس شرک سے بہت بلند ہے جو یہ لوگ کرتے ہیں
بھلا ایک بات اور بتلاؤ کون تم کو برو بحر کے اندھیروں میں مطالب کی طرف راہ نمائی کرتا ہے یعنی کس نے وہ علامات پیدا کر رکھی ہیں جن سے تم راہ یاب ہوسکتے ہو اور کون اپنی رحمت یعنی بارش سے پہلے ہواؤں کو خوشخبری دیتے کیلئے بھیجتا ہے جن کے آنے سے لوگ جان جاتے ہیں کہ باران رحمت کا نزول ہوا چاہتا ہے کیا ایسے کام کرنے میں کوئی اور معبود بھی اللہ کے ساتھ ہے ! کچھ شک نہیں کہ اللہ تعالیٰ ان کے شرک سے بلند ہے