سورة المدثر

لَوَّاحَةٌ لِّلْبَشَرِ

کھال کو جھلس دینے والی

لَوَّاحَةٌ لِّلْبَشَرِ: ’’ لَوَّاحَةٌ ‘‘ ’’لَاحَ يَلُوْحُ‘‘ ( ن) اور ’’لَوَّحَ يُلَوِّحُ‘‘ (تفعیل) کا معنی جلانا، متغیر کرنا بھی آتا ہے اور ظاہر ہونا اور چمکنا بھی آتا ہے۔ ’’اَلْبَشَرُ‘‘ ’’بَشَرَةٌ ‘‘ کی جمع ہے، کھالیں، یا ’’اَلْبَشَرُ‘‘ بمعنی آدمی ہے۔ پہلی صورت میں مطلب یہ ہے کہ وہ کھالوں کو جلا کر سیاہ کر دینے والی ہے (کھالوں کا ذکر خاص طور پر اس لیے کیا کہ آدمی کو اپنے جس حسن و جمال پر ناز ہوتا ہے وہ اسی کھال ہی کی وجہ سے ہوتا ہے) یا وہ آدمیوں کو جلا دینے والی ہے ۔ دوسری صورت میں معنی یہ ہے کہ وہ جسم پر چمکتی ہوئی نظر آئے گی۔ شاہ عبد القادر لکھتے ہیں: ’’جیسے لوہا دہکتا سرخ نظر آتا ہے، آدمی کے پنڈے پر وہ سرخ نظر آئے گی۔‘‘ (موضح)