سورة غافر - آیت 31

مِثْلَ دَأْبِ قَوْمِ نُوحٍ وَعَادٍ وَثَمُودَ وَالَّذِينَ مِن بَعْدِهِمْ ۚ وَمَا اللَّهُ يُرِيدُ ظُلْمًا لِّلْعِبَادِ

ترجمہ ترجمان القرآن - مولانا ابوالکلام آزاد

اور تمہارا بھی وہی حشر نہ ہوتوجوقوم نوح اور عاد اور ثمود اور ان کے بعد دوسری قوموں کا ہوا اور اللہ اپنے بندوں پر ظلم کرنا نہیں چاہتا ہے۔

تفسیر القرآن کریم (تفسیر عبدالسلام بھٹوی) - حافظ عبدالسلام بن محمد

مِثْلَ دَاْبِ قَوْمِ نُوْحٍ....: ’’دَأَبَ يَدْأَبُ دَأْبًا‘‘ (ف) کسی کام میں مسلسل لگے رہنا۔ ’’ دَاْبِ ‘‘ اصل میں عادت کو کہتے ہیں، کیونکہ اس میں ہمیشگی ہوتی ہے، پھر کسی کے حال یا معاملے کے معنی میں بھی استعمال ہونے لگا۔ یعنی میں تمھارے بارے میں ڈرتا ہوں کہ تمھارا حال قوم نوح، عاد و ثمود اور ان لوگوں جیسا نہ ہو جو ان کے بعد تھے، مثلاً قوم لوط اور قوم شعیب وغیرہ، جنھوں نے اپنے پیغمبروں کو جھٹلایا اور انھیں ایذا پہنچانے کی کوشش کی تو ان پر اللہ تعالیٰ کا ایسا عذاب آیا جس نے انھیں بری طرح تباہ و برباد کر دیا۔ وَ مَا اللّٰهُ يُرِيْدُ ظُلْمًا لِّلْعِبَادِ: ’’ ظُلْمًا ‘‘ کی تنوین تنکیر کے لیے ہے، اس لیے ترجمہ ’’کسی طرح کا ظلم‘‘ کیا گیا ہے۔ یعنی ان اقوام پر جو عذاب آیا وہ ان کے اپنے اعمالِ بد کا نتیجہ تھا، اللہ تعالیٰ اپنے بندوں پر کسی طرح کے ظلم کا ارادہ تک نہیں کرتا تو وہ ظلم کیوں کرے گا، پھر ظلم بھی اپنے بندوں پر ؟ یہ ہو ہی نہیں سکتا۔ ارشاد باری تعالیٰ ہے : ﴿ اِنَّ اللّٰهَ لَا يَظْلِمُ النَّاسَ شَيْـًٔا وَّ لٰكِنَّ النَّاسَ اَنْفُسَهُمْ يَظْلِمُوْنَ ﴾ [ یونس : ۴۴ ] ’’بے شک اللہ لوگوں پر کچھ بھی ظلم نہیں کرتا اور لیکن لوگ اپنے آپ پر ظلم کرتے ہیں۔‘‘