سورة الحجر - آیت 7

لَّوْ مَا تَأْتِينَا بِالْمَلَائِكَةِ إِن كُنتَ مِنَ الصَّادِقِينَ

ترجمہ ترجمان القرآن - مولانا ابوالکلام آزاد

اگر تو اپنے دعوے میں سچا ہے تو ایسا کیوں نہیں کرتا کہ فرشتے اتار کر ہمیں دکھا دے۔

تفسیر القرآن کریم (تفسیر عبدالسلام بھٹوی) - حافظ عبدالسلام بن محمد

لَوْ مَا تَاْتِيْنَا بِالْمَلٰٓىِٕكَةِ : کہ فرشتے سامنے آ کر گواہی دیں کہ یہ واقعی اللہ کا سچا پیغمبر ہے، اس کی پیروی اختیار کرو، جیسا کہ اللہ تعالیٰ نے ان کے اس مطالبے کا کئی جگہ ذکر کیا ہے، فرمایا : ﴿ وَ قَالُوْا لَوْ لَا اُنْزِلَ عَلَيْهِ مَلَكٌ ﴾ [ الأنعام : ۸ ] ’’اور انھوں نے کہا اس پر کوئی فرشتہ کیوں نہ اتارا گیا؟‘‘ اور دیکھیے سورۂ زخرف (۵۳) اورسورۂ فرقان( ۲۱، ۲۲) اور یہ بھی ہو سکتا ہے کہ جب آپ صلی اللہ علیہ وسلم ان کو عذاب سے ڈراتے تو انھوں نے ’’ لَوْ مَا تَاْتِيْنَا بِالْمَلٰٓىِٕكَةِ ‘‘ کہہ کر عذاب کا مطالبہ کیا ہو۔ (کبیر)