سورة الرحمن - آیت 29
يَسْأَلُهُ مَن فِي السَّمَاوَاتِ وَالْأَرْضِ ۚ كُلَّ يَوْمٍ هُوَ فِي شَأْنٍ
ترجمہ ترجمان القرآن - مولانا ابوالکلام آزاد
سب آسمانوں اور زمین والے اسی سے مانگتے ہیں وہ ہر آن ایک نہ ایک شان میں ہے
تیسیر الرحمن لبیان القرآن - محمد لقمان السلفی رحمہ اللہ
(13) آسمانوں اور زمین میں اللہ کی جتنی مخلوقات ہیں، سب اسی کے محتاج ہیں اور وہ ذات واحد غنی اور بے نیاز ہے، سب اس کی رحمت کی امید لگائے رہتے ہیں، اسی کو پکارتے ہیں، اسی کے سامنے دست سوال پھیلاتے ہیں اور وہی سب کے دامن مرادوں سے بھرتا ہے وہ قادر مطلق کائنات میں اپنی مشیت کے مطابق تصرف کرتا ہے، زندہ کرتا ہے اور مارتا ہے روزی دیتا ہے اور فقیر بناتا ہے، عزت و ذلت دیتا ہے، بیماری اور شفا دیتا ہے کسی کو دیتا ہے اور کسی کو نہیں دیتا اور کسی کو معاف کرتا ہے اور کسی کو سزا دیتا ہے۔ علی ہذا القیاس اس آسمان و زمین میں اسی کی بادشاہی ہے اور اسی کا حکم چلتا ہے وہی اپنے بندوں کی تمام ضرورتیں پوری کرتا ہے۔