سورة غافر - آیت 13

هُوَ الَّذِي يُرِيكُمْ آيَاتِهِ وَيُنَزِّلُ لَكُم مِّنَ السَّمَاءِ رِزْقًا ۚ وَمَا يَتَذَكَّرُ إِلَّا مَن يُنِيبُ

ترجمہ ترجمان القرآن - مولانا ابوالکلام آزاد

وہ اللہ ہی ہے جو تمہیں اپنی نشانیاں دکھاتا ہے اور آسمان سے تمہارے لیے رزق اتارتا ہے اور ان باتوں سے صرف وہی نصیحت حاصل کرتا ہے جو اللہ کی طرف رجوع ہونے والا ہو

تیسیر الرحمن لبیان القرآن - محمد لقمان السلفی رحمہ اللہ

(8) اہل کفر و شرک کے لئے قیامت کے دن وعید شدید کا بیان کئے جانے کے بعد، اب انہیں اس دن سے پہلے اس دنیاوی زندگی میں دعوت ایمان دی جا رہی ہے، تاکہ موت سے پہلے ہی تائب ہو کر زمرہ مومنین میں داخل ہوجائیں اور جہنم کا ایندھن نہ بنیں، اللہ تعالیٰ نے فرمایا کہ اے اہل قریش ! تم دیکھتے نہیں کہ اللہ تعالیٰ اپنی توحید اور اپنی عظمت و قدرت کے عظیم دلائل تمہارے سامنے پیش کرتا ہے اور وہی آسمان سے تمہارے لئے روزی بھیجتا ہے؟ پھر اللہ تعالیٰ نے خود ہی کہا کہ نصیحت تو وہ حاصل کرتا ہے جو گناہوں سے تائب ہوتا ہے اور ہر حال میں اللہ کی طرف رجوع کرتا ہے۔