وَسِيقَ الَّذِينَ اتَّقَوْا رَبَّهُمْ إِلَى الْجَنَّةِ زُمَرًا ۖ حَتَّىٰ إِذَا جَاءُوهَا وَفُتِحَتْ أَبْوَابُهَا وَقَالَ لَهُمْ خَزَنَتُهَا سَلَامٌ عَلَيْكُمْ طِبْتُمْ فَادْخُلُوهَا خَالِدِينَ
اور جو لوگ اپنے رب سے ڈرتے رہے ان کو گروہ درگروہ جنت کی طرف چلایاجائے گا یہاں تک کہ جب وہ وہاں پہنچیں گے اور اس کے دروازے کھلے ہوں گے اور جنت کے خازن ان سے کہیں گے تم پرسلام ہوتم خوش حال رہو سو جنت میں ہمیشہ رہنے کے لیے اس میں داخل ہوجاؤ۔
(44) اور اللہ سے ڈرنے والوں کو ان کی خدمت پر متعین فرشتے نہایت تزک و احتشام کے ساتھ جنت کی طرف مخصوص سواریوں پر لے جائیں گے اور جب وہاں پہنچیں گے تو جنت کے دروازوں کو اپنے استقبال میں پہلے سے کھلا ہوا پائیں گے اور فرشتے انہیں سلام کریں گے اور کہیں گے کہ اب آپ لوگ تمام آفات و بلیات سے امن میں آگئے، آپ حضرات کی زندگی دنیا میں شرک و معاصی کی آلائشوں سے پاک تھی، اس لئے جنت میں ہمیشہ کے لئے داخل ہوجایئے۔