سورة لقمان - آیت 25

وَلَئِن سَأَلْتَهُم مَّنْ خَلَقَ السَّمَاوَاتِ وَالْأَرْضَ لَيَقُولُنَّ اللَّهُ ۚ قُلِ الْحَمْدُ لِلَّهِ ۚ بَلْ أَكْثَرُهُمْ لَا يَعْلَمُونَ

ترجمہ ترجمان القرآن - مولانا ابوالکلام آزاد

اگر آپ ان سے دریافت کریں کہ آسمانوں اور زمین کو کس نے بنایا ہے ؟ تو وہ ضرور کہیں گے کہ اللہ نے آپ کہیے سب تعریف اللہ کے لیے ہے مگر ان میں سے اکثر لوگ جانتے نہیں ہیں (٥)۔

تفسیرتیسیرارحمٰن - محمد لقمان سلفی

(18) اللہ تعالیٰ نے فرمایا کہ اے میرے نبی ! اگر آپ ان مشرکین سے پوچھیں گے کہ ان آسمانوں اور زمین کو کس نے پیدا کیا ہے؟ تو وہ کہیں گے، اللہ ۔آپ کہہ دیجیے کہ اللہ کا شکر ہے کہ تمہارے خلاف حجت قائم ہوگئی، جب تم اعتراف کرتے ہو کہ وہی خالق و رازق اور مالک کل ہے، تو پھر تم کس دلیل کی بنیاد پر اس کے سوا دوسرے جھوٹے معبودوں کی پرستش کرتے ہو؟ اللہ نے فرمایا : اکثر و بیشتر مشرکین کی عدم توفیق کا حال یہ ہے کہ ایسی کھلی حقیقت کو بھی نہیں سمجھ پاتے۔