سورة العنكبوت - آیت 44

خَلَقَ اللَّهُ السَّمَاوَاتِ وَالْأَرْضَ بِالْحَقِّ ۚ إِنَّ فِي ذَٰلِكَ لَآيَةً لِّلْمُؤْمِنِينَ

ترجمہ ترجمان القرآن - مولانا ابوالکلام آزاد

اللہ تعالیٰ نے آسمانوں اور زمین کو حکمت اور مصلحت کے ساتھ پیدا کیا اور بلاشبہ اس باب میں ارباب الایمان کے لیے معرفت حق کی بڑی نشانیاں ہیں (١٥)۔

تفسیرتیسیرارحمٰن - محمد لقمان سلفی

(24) شرک کی تردید کرنے کے بعد اب یہاں یہ بتایا جارہا ہے کہ جس اللہ نے آسمان اور زمین کو ایک خاص مقصد کی خاطر پیدا کیا ہے یقینا وہی قادر مطلق عبادت کے لائق ہے لیکن اس حقیقت کا ادراک اہل ایمان ہی کرپاتے ہیں کافروں کی آنکھوں پر پٹی باندھی ہوتی ہے اور ان کے دلوں پر مہر لگی ہوتی ہے انہیں آسمان وزمین کی تخلیق اور ان کے خالق کے بارے میں غوروفکر کی کہاں توفیق ہوتی ہے۔