سورة الأنبياء - آیت 77

وَنَصَرْنَاهُ مِنَ الْقَوْمِ الَّذِينَ كَذَّبُوا بِآيَاتِنَا ۚ إِنَّهُمْ كَانُوا قَوْمَ سَوْءٍ فَأَغْرَقْنَاهُمْ أَجْمَعِينَ

ترجمہ ترجمان القرآن - مولانا ابوالکلام آزاد

نیز ان لوگوں کے مقابلہ میں جو ہماری نشانیاں جھٹلاتے تھے اس کی مدد کی، وہ بڑے ہی بدراہ لوگ تھے پس ہم نے ان سب کو غرق کردیا۔

تیسیر الرحمن لبیان القرآن - محمد لقمان السلفی رحمہ اللہ

لیکن وہ لوگ اپنے کفر و استکبار پر اڑے رہے، تو نوح (علیہ السلام) نے ان پر بددعا بھیج دی اور اپنے رب سے کہا : ﴿ أَنِّي مَغْلُوبٌ فَانْتَصِرْ﴾ اے میرے رب ! میں مغلوب ہوں تو میری مدد فرما۔ (القمر : ١٠) اور کہا : ﴿ رَبِّ لَا تَذَرْ عَلَى الْأَرْضِ مِنَ الْكَافِرِينَ دَيَّارًا ﴾ میرے رب زمین پر کسی کافر کا گھر نہ چھوڑ۔ (نوح : ٢٦) تو اللہ تعالیٰ نے طوفان کے ذریعہ نوح اور مسلمانوں کے سوا تمام کافروں کو ہلاک کردیا، نوح (علیہ السلام) طوفان کے بعد ساٹھ سال تک زندہ رہے، اس طرح ان کی مجموعی عمر ایک ہزار پچاس سال ہوتی ہے۔