قَالَ اخْرُجْ مِنْهَا مَذْءُومًا مَّدْحُورًا ۖ لَّمَن تَبِعَكَ مِنْهُمْ لَأَمْلَأَنَّ جَهَنَّمَ مِنكُمْ أَجْمَعِينَ
خدا نے فرمایا یہاں سے نکل جا، ذلیل اور ٹھکرایا ہوا، بنی آدم میں سے جو کوئی تیری پیروی کرے گا تو (وہ تیرا ساتھی ہوگا اور) میں البتہ ایسا کروں گا کہ ( پاداش عمل میں) تم سب سے جہنم بھر دوں گا۔
ابلیس کو تو اللہ تعالیٰ نے جنت سے نکال دیا، اور آدم کے بعد اسکی بیوی کو پیدا کرکے ان دونوں سے فرمایا ’’کہ یہ جنت تمہارا مسکن ہے یہاں سے جو چاہو اور جتنا چاہو کھاؤ پیؤ، البتہ اس ایک درخت کے قریب نہ پھٹکنا۔‘‘ یہ درخت کونسا تھا اسکی حقیقت جاننے کی ضرورت نہیں، اس حکم سے مقصو د حضرت آدم و حوّا کی آزمائش تھی کہ وہ کہاں تک اللہ کا یہ حکم بجا لاتے ہیں اور شیطان جو اپنی چھاتی پر ہاتھ مار کر کہتا تھا کہ میں آدم اور اس کی اولاد کو گمراہ کرکے چھوڑوں گا، کیا یہ اس کی چالوں میں آتے ہیں یا نہیں۔