سورة البقرة - آیت 58

وَإِذْ قُلْنَا ادْخُلُوا هَٰذِهِ الْقَرْيَةَ فَكُلُوا مِنْهَا حَيْثُ شِئْتُمْ رَغَدًا وَادْخُلُوا الْبَابَ سُجَّدًا وَقُولُوا حِطَّةٌ نَّغْفِرْ لَكُمْ خَطَايَاكُمْ ۚ وَسَنَزِيدُ الْمُحْسِنِينَ

ترجمہ ترجمان القرآن - مولانا ابوالکلام آزاد

اور پھر (کیا اس وقت کی یاد بھی تمہارے اندر عبرت پیدا نہیں کرسکتی) جب (ایک شہر کی آبادی تمہارے سامنے تھی اور) ہم نے حکم دیا تھا کہ اس آبادی میں (فتح مندانہ) داخل ہوجاؤ اور پھر کھاؤ پیو، آرام چین کی زندگی بسر کرو، لیکن جب شہر کے دروازے میں قدم رکھو، تو تمہارے سر اللہ کے حضور جھکے ہوئے ہوں اور تمہاری زبانوں پر توبہ واستغفار کا کلمہ جاری ہو کہ حطۃ! حطۃ! (خدایا ہمیں گناہوں کی آلودگی سے پاک کردے ! اگر تم نے ایسا کیا، تو) اللہ تمہاری خطائیں معاف کردے گا، اور (اس کا قانون یہی ہے کہ) نیک کردار انسانوں کے اعمال میں برکت دیتا ہے اور ان کے اجر میں فراوانی ہوتی رہتی ہے

تسہیل البیان فی تفسیر القرآن - ام عمران شکیلہ بنت میاں فضل حسین

پیچھے ہم پڑھ چکے ہیں کہ اللہ نے وعدہ کیا تھا ۔ وہ وعدہ ملک شام پر حملہ کرنے اور فتح کا تھا۔ مگر بنی اسرائیل چونکہ غلام قوم تھی جو بزدل ہوچکی تھی، کہنے لگے کہ وہ جابر قسم کے لوگ ہیں ہم ان کا مقابلہ نہیں کرسکتے اگر حملہ اتنا ہی ضروری ہے تو جاؤ تم اور تمہارا خدالڑے ہم تو یہاں بیٹھے ہیں ۔ اس پر اللہ تعالیٰ نے ملک شام کی فتح چالیس سال تک مؤخر کردی تاکہ اس عرصہ میں یہ نسل مر کھپ جائے اور آئندہ جو نسل پیدا ہو وہ بیابانوں اور صحراؤں کی آزاد فضا میں پل بڑھ کر جوان ہو اس میں ہمت اور جرأت پیدا ہو اور وہ جہاد کے قابل ہوجائیں۔ اب جب اس نسل نے ملک شام کو فتح کرلیا تو اللہ نے فرمایا: اس کے دروازے سے سجدہ کرتے ہوئے اور معافی مانگتے ہوئے داخل ہونا ۔ کسی پر ظلم نہ کرنا۔ لوگوں کی خطائیں معاف کرنا۔ میں بھی تمہیں اور تمہاری خطاؤں کو معاف کر دوں گا۔